Специалисттæ базилдзысты, Московскийы æмæ Владикавказскийы уынгты тигъыл парчы хаймæ
Дзæуджыхъæуы райдыдтой Афгайнаг сквер аив кæнын. Специалисттæ базилдзысты, Московскийы æмæ Владикавказскийы уынгты тигъыл парчы хаймæ. Ныридæгæн систой зæронд асфальт, сæвæрдтой бордюртæ. Территоримæ баластой фæндæгты бындурæн хуыр. Куыстытæ æххæстгонд цæуынц муниципалон программæ “Аивдзинад æмæ цъæх фæлыст”-мæ гæсгæ. Бæлвырддæр радзурдзæн Хъайтмазты Дзерассæ.
Сывæллæтты ног фæз Афгайнаг парчы зæронды бæсты нæ сæвæрдтой, фæлæ куыд уæлæмхасæн. Нырма конструкци быруйæ æхгæд у, хæстæгдæр рæстæг æй специалисттæ бафидар кæндзысты бетон бындурыл. Уæлцъар фæнд кæнынц резинæйæ скæнын. Уыимæ аразджытæ базилдзысты зæронд фæзмæ дæр.
Парчы сног кæндзысты æрмæст фæз нæ, аив дзы кæнынц территори дæр. Æфсæддонтæн-интернационалисттæн цыртдзæвæнмæ хæстæг куыстытæ райдыдтой къуырийы размæ. Объекты фæллой кæны 4 адæймагæй бригад.
Базилдзысты ма бандæттæм, сног кæндзысты газон æмæ сæвæрдзысты урнæтæ. Куыстытæ æххæстгонд цæуынц къæпхæнгай.
Ацы цъæх зонæ микрорайоны цæрджытæн у уарзондæр фæлладуадзæн бынæттæй иу. Паркмæ æрбацæуынц горæты иннæ районтæй дæр. Гуыриаты Светланæ скверы арæх нæ вæййы, фæлæ ивддзинæдтæ бафиппайдта. Боциты Ибрагим та ардæм къуыри цалдæр хатты æрбацæуы.
Специалисттæ зæрдæ æвæрынц, куыстытæ нысангонд æмгъуыдæй раздæр фæуынæй. Объект хъуамæ сцæттæ уа фæззæгмæ, фæлæ аразджытæ куыстытæ фæнд кæнынц августы фæуын.
