Специалистты бригадтæ фыццаджыдæр зилынц сæйраг уынгтæм æмæ магистральтæм
Дзæуджыхъæуы райдыдтой фæндæгтæ цалцæг кæнын. Специалистты бригадтæ фыццаджыдæр зилынц сæйраг уынгтæм æмæ магистральтæм. Ног кæнынц фæндæгты хæххытæ æмæ фистæгæйцæуджытæн ацæуæнтæ.
Арф дзыхъхъытæ, пырх фæндаг. Ахæм цæлхдурты сæрты ахизын хъæуы шофырты. Доваторы проспекты ацы уаццаг «Спецэкосервис»-ы специалисттæ нымайынц æппæтæй тынгдæр базилын кæмæ хъæуы, уыдонæй иуыл. Алы дзыхъхъ дæр сæхгæныны размæ хъæуы бацæттæ кæнын.
Дзæуджыхъæуы райдыдта фæндæгты дзыхъхъытæ цалцæг кæныны сезон. Специалистты ныхæстæм гæсгæ, сæйраг уынгты æмæ магистральты дзыхъхъытæ сæвзæрд, мит тайын куы райдыдта, уый фæстæ. Ныртæккæ горæты уынгты фæндаггон къуылымпыдзинæдтæ аиуварс кæныныл кусы 2 бригады.
Даддæр æххæстгонд цæуынц фæндæгтыл нысантæ хахх кæныны куыстытæ дæр. Фыццаджыдæр, ноггонд цæуынц фистæгцæуджытæн ахизæнтæ алвæндæгтыл. Ног хæххытæ фæзынд, Нальчикскийы уынг æмæ Къостайы проспект кæм баиу вæййынц, уым. Специалисттæ куыд зæгъынц, афтæмæй куыстытæ æххæст кæнынц паддзахадон стандартмæ гæсгæ. Куы сахорынц, уый фæстæ уаццагыл сæвæрынц сæрмагонд рухсæздахæн буаргъæдæй. Уый шофыртæн æххуыс у талынг рæстæг.
Сæрды кæронмæ æппæт уаццæгтыл дæр куыстытæ фæуыдзысты, сæрмагонд æргом здæхт цæудзæн – скъолаты æмæ сывæллæтты рæвдауæндæтты раз территоритæм.
