Специалисттæ ивынц асфальт, бордюртæ æмæ фæндаггон нысантæ. Уыимæ зилынц хæдзæртты кæртытæм æмæ алфамбылай территоритæм
Дзæуджыхъæуы сæ тæмæны бацыдысты фæндæгтæ цалцæггæнæн куыстытæ. Специалисттæ ивынц асфальт, бордюртæ æмæ фæндаггон нысантæ. Уыимæ зилынц хæдзæртты кæртытæм æмæ алфамбылай территоритæм.
Черменыхъæумæ фæндагыл цалцæггæнæн куыстытæ цæуынц нысангонд æмгъуыдæй тагъддæр. Уыимæ хæрзхъæддзинадыл цыбырдæр æмгъуыд нæ фæзындзæн. Специалисттæ куыд зæгъынц, афтæмæй фæндаг райстой заууат уавæры. Æдæппæтæй та ацы ран базилдзысты фæндаджы цыппар мин квадратон метрмæ. Фæстаг цалдæр азы шофыртæ æдзухдæр хъаст кодтой фæндаджы уавæрыл. Цалцæггæнæн куыстытæ дзы сарæзтой дæс азы размæ. Фæндаг сцалцæг кодтой, фæлæ æрмæстдæр ранæй рæтты.
Садовыйы уынг ис пырх фæндæгты картæйы. Асфальтæй æмбæрзт та уæвгæ дæр никуы уыдис. Рацараздзысты йæ æдас æмæ хæрзхъæд фæндæгты национ проекты фæрцы. Куыстытæ сæ тæмæны сты Владикавказскийы уынджы дæр. Фæндаггон хыз специалисттæ цалцæг кæнынц къæпхæнгай. Ивынц æрмæст асфальт нæ, фæлæ зилынц тротуартæ æмæ хæдзæртты алывæрстæм. Ивынц бордюртæ æмæ фæндаггон нысантæ. Тагъд рæстæг ам фæзындзæн ног фистæгæйцæуæн бынат. Фæуæрæхдæр æй кæндзысты æртæ метры онг. Уый фæрцы аллеяйы скæндзысты бадæн бынæттæ æмæ сæвæрдзысты рухсгæнæнтæ.
Куыстытæ цæуынц чысыл уаццæгтыл дæр. Мамсыры-фырты уынг цæттæ кæнынц асфальт баивынмæ. Ныр та уал специалисттæ исынц уæлцъар æмæ ивынц бордюртæ. Фæндаджы уаццаджы иумæйаг бæрц у астсæдæ метры æмæ специалистты хъуыдымæ гæсгæ, нымад уыд аварийон бынатыл.
Æдæппæтæй ацы аз æдас æмæ хæрзхъæд фæндæгты национ проекты фæрцы сцалцæг кæндзысты 22 уаццаджы. Ныртæккæ куыстытæ цæуынц 11 объектыл.
