Архайдтой дзы куыд фистæгæфсæддонтæ, афтæ бронетехникæ дæр
Рæдыд æруадзынæн бар нæй. Дзæуджыхъæуы Сæрибары фæзы арæзт æрцыд Уæлахизы Парады репетици. Архайдтой дзы куыд фистæгæфсæддонтæ, афтæ бронетехникæ дæр. Ацы цаумæ репетицийы архайджытæ алы хатт дæр зæрдиагæй фенхъæлмæ кæсынц. Куыд бацæттæ кодтой сæхи ацы аз, уый тыххæй радзурдзæн Фидараты Маринæ.
Дыккаг репетицийы æппæт хъæлæстæ азæлыдысты иумæ. Ахæм иудзинад бæрæг дары парады архайджытæм се ппæтмæ дæр. Æфсæддонтæ маршы зæлтæм гæсгæ рæнхъытæй цæуынц иттæг раст. Ууыл сæхи ахуыр кæнынц æвзонг суворовонтæ дæр. Парады сыл уыдзæн хицæн хæс æвæрд. Байгом кæндзысты æфсæддон кадджын рацыд. Æвзонг суворовонтимæ Сæрибары фæзы маршы рацæудзысты сæ хистæр æмбæлттæ дæр, Дзæуджыхъæуы 22-æм æмæ 44-æм скъолаты æвзонг æфсæддонтæ, стæй Цæгат Ирыстоны паддзахадон университеты æфсæддон центры студенттæ. Уыдонæн хæсты ветеранты рæзты рацæуын у стыр кадыл нымад, стæй сын æгæрон бузныг зæгъыны фадат Стыр Уæлахизы тыххæй.
Парады фенæн уыдзæн Фыдыбæстæйы Стыр хæсты рæстæг историон æфсæддон формæ. Уый уыдзæн Воронежы 19-æм дивизийы æфсæддонтыл конд. Сæ фæстæ та рацæудзысты æфсæддон сылгоймæгтæ. Фистæгцæуджыты хсæн уыдзæн, Парады фыццаг хатт чи архайдзæн, ахæмтæ дæр. Зæгъæм, Илья Ступин кадджын маршы рацæудзæн 100-йæм хицæн сгарæн бригады уæвгæйæ.
Фистæгæфсæддонты фæстæ фæзмæ рацæудзæн хæстон техникæ. БТР-82, БМП-3, залпы системæ «Ураган». 9-æм майы бацархайдзæн техникæйы 17 машинæйы. Парад сæхгæндзæн Дзæуджыхъæуы гарнизоны иугонд æфсæддон оркестр.
Уæлахизы Парады размæ ма æфсæддонтæ скæндзысты иу репетици. Уыдзæн 7-æм майы райсомæй.
