Цæгат Кавказы иунæг чи у, уыцы трамвай рæвдауы горæты цæрджыты зæрдæтæ
Дзæуджыхъæуы символ æмæ æхсæнадон транспорты рагондæр хуыз. Цæгат Кавказы иунæг чи у, уыцы трамвай рæвдауы горæты цæрджыты зæрдæтæ. Ныртæккæ маршрутмæ алы бон дæр рацæуы 12 вагоны. Ацы мæйы райдиан трамвай ногæй цæуын райдыдта Сабырдзинады проспектыл. Куыд зонут, афтæмæй дзы цыдысты цалцæггæнæн куыстытæ. Владтрамвайы специалисттæ сæ баззадысты разыйæ. Бæлвырддæр хабæрттæ радзурдзæн Тъехты Элинæ.
Трамвайы шофыры куыст иу хатт чи афæлвара, уый дзы баззайдзæн бирæ азты. Ахæм зондахаст ис Лазарты Татьянæмæ. Уыцы куыст кæны 30 азæй фылдæр. Бæлццæтты хсæн ын ис йæ зонгæтæ, бирæты номæй номмæ дæр зоны. Куыд зæгъы, афтæмæй Дзæуджыхъæуы цæрджыты уарзондæр транспорты хуызтæй иу у трамвай.
Ныридæгæн Дзæуджыхъæуы фæндæгтыл цæуынц 12 трамвайы. Октябры райдайæн бирæ кæмæ æнхъæлмæ кастысты, уый рацыд сабырдзинады проспектмæ. Специалисттæ куыд зæгъынц, афтæмæй трамвайты фæндæгтæ ивд нæ уыдысты дæсгай азты дæргъы. Ныр цы цалцæггæнæн куыстытæ кæнынц, уыдон сты хъæугæ. Рельстæ сты хорз, Дзæуджыхъæуы трамвайты кусджытæ сты разы. Зæгъын ма хъæуы уый дæр, æмæ трамвайты системæ у æнæхъæн комплекс. Уыцы комплексмæ канд вагæттæ нæ хауынц, фæлæ ма электрон дæлстанцæтæ æмæ фæндаггон хæдзарад дæр. Цæмæй трамвайты транспортон инфраструктурæ куыд æмбæлы, ахæм уавæрмæ æркæной, уый тыххæй хъæуы 1 миллиард сомæй фылдæр.
Вагæттæ цалцæггæнæн бынаты цы специалисттæ кусынц, уыдонмæ ныридæгæн ис 6 вагоны. Кусынц фыранкыл. Хъæуы сæ цæлхытæ æмæ уромæнтæ баивын. Куыстытæ кæнынц бынæттон специалисттæ. 40 азæй фылдæр Хацырты Валентинæ кусы ацы дæсныйады. Йæ цæстытыл æвдайæм азты сног кодтой трамвайты парк. Куыд зæгъы, афтæмæй йын зын куыст у. 16 тонны цы трамвай ласы, ууыл архайын æнцон нæу. Уæлдайдæр та машинæты змæлды хсæн. Тæссаг фæндаг у Пожарскийы уынджы æмæ Хæххон металлургон институты хсæн. Сцалцæг кæнын хъæуы Чапаевы уынгæй Минины æмæ Пожарскийы уынгтæм цы фæндæгтæ цæуынц, уыдон дæр. Цæмæй трамвай рельсытæй ма фæхауа, уый тыххæй шофыры фæхъæуы сабырдæр цæуын.
Ноджы ма зын кусæн у фæндагыл сæрмагонд амонæнтæ кæй нæй, уый тыххæй дæр. Машинæтæй раст цы шофыртæ нæ цæуынц, уыдон дæр хъыгдарынц трамвайты куысты. Бирæтæ сæ машинæтæ ныууадзынц трамвайы фæндæгтыл. Весеннийы уынджы та рацæуæнтæ сты хæдзæртты кæртытæй. Фæлæ æппæтæй ахсджиагдæр фарста баст у мыздимæ.
Дзæуджыхъæуы трамвайты парк фæнд кæнынц сног кæнын. Тагъд рæстæджы ног вагæттæ лæггад кæндзысты цæрджытæн. 28 трамвайы хъуамæ сласой Уралæй. Æмбырд сæ кæнынц бынæттон фæндæгты хицæндзинæдтæ хынцгæйæ.
Трамвай у Дзæуджыхъæуы символ. Романтикон транспортты хуызтæй иу. Цæгат Кавказы регионтæй йæ лæггæдтæй пайда кæнынц æрмæстдæр нæ республикæйы цæрджытæ.
