Уæвгæ фæстаг 20 азмæ ацы цæрæгойтæн ног фæлтæр рацыд фыццаг хатт. Ныййарджытæ сæ лæппыныл аудынц, æмæ йæ нырма никæмæ вдисынц. Фæлæ йæ не сфæлдыстадон къордæн фенын бантыст. Бæлвырддæр хабæрттæ радзурдзæн Фидараты Маринæ.
Ацы лæппынæн йæ сындзытæ нырма фæлмæн сты. Нырма уал æмбæхсы йæ мады фæстæ. Уый та йæ цæстыгагуыйау хъахъхъæны. Йæ фыд та сæм дардæй, фæлæ уарзæгой цæстæнгасæй кæсы. Дикобразы лæппын райгуырд Дзæуджыхъæуы сырддоны. Йæ фарсмæ цы маймулитæ цæрынц, уыдон дæр тынг цымыдисæй кæсынц сæ ног сыхагмæ. Лæппыныл цæуы дыууæ къуырийы. Йæ ныййарджытæ æппынæдзухдæр сты йæ разы. Видеокамерæ фенгæйæ, æвæстиатæй бакатай кодтой, фæлæ уайтагъд сæхимæ æрцыдысты. Дыууæ боны размæ дæр ма ног цæрæджы фенæн не нтыст суанг сырддоны кусджытæн дæр.
Ног лæппын куы фæзынд, уæд дикобразтæ тыхсын райдыдтой. Иуы бахъуыд æндæр ранмæ раивын. Уымæн æмæ лæппыны ныййарджытæн уыд тæссаг. Ныр иннæ дикобраз æрбынæттон ис ног вольеры. Æртæ мæйы онг лæппын уыдзæн йæ мады фарсмæ. Æхсыры фæстæ йæ ахуыр кæндзысты æндæр хойрагы хæрыныл. Зæгъын ма хъæуы уый дæр, æмæ фæстаг 20 азмæ ацы цæрæгойты хуыз фыццаг хатт рауагъта ног фæлтæр.
Уæвгæ, дикобразтæ Дзæуджыхъæуы сырддоны фæзындысты æнахуыр хуызы. Кæддæр сын уыди æндæр хицæуттæ. Фæлæ сæ сæ бон дарын нал уыди. Афтæмæй æрбынат кодтой сырддоны. Ахæм хуызы дзы фæзындысты сурикаттæ дæр. Тынг тæлфаг цæрæгойтæ сты. Цалынмæ иу йæ фæллад уадзы, уæдмæ иннæ та къахы дзыхъ. Уæдæ еноттæ дæр афтæмæй æрцардысты Дзæуджыхъæуы сырддоны. Бирæ рынчын æмæ æвæгæсæг цæрæгойты суазæг кодта ацы бынат. Фæлæ чысыл дикобразæн та ис уарзондзинады истори. Тагъд рæстæджы йæ йæ ныййарджытæ ракæндзысты вольермæ. Уæд сырддоны кусджытæ базондзысты, лæппу у, æви чызг, æмæ йын ратдзысты ном. Уæд се ппæт æрбацæуджытæн дæр уыдзæн фадат цымыдисаг цæрæгойимæ базонгæ уæвынæн.
