Сабитæ дзы зонгæ кæнынц робототехникæимæ æмæ программæтæ кæнынимæ
Дзæуджыхъæуы сывæллæтты 107-æм рæвдауæндоны байгом нымæцон лаборатори. Сабитæ дзы зонгæ кæнынц робототехникæимæ æмæ программæтæ кæнынимæ. Хъомылгæнинæгтæ æрмæст роботты не мбырд кæнынц, фæлæ ма аразынц эксперименттæ нырыккон ифтонггæрзты фæрцы. Афтæмæй ныридæгæн цæттæ кæнынц фидæны дæсныйæдтæм. Бæлвырддæр радзурдзæн Хъайтмазты Дзерассæ.
6-аздзыд Къудухты Аланæйæн роботехникæ у уарзон хобби. Сывæллæтты нымæцон лабораторийы фыццæгты æмрæнхъ райдыдта ахуыр кæнын. Ног ифтонггрæзтимæ архайын æм райдианы зын фæкастис, зæгъы чызг, фæлæ йын хъомылгæнджыты куысты фæрцы бантыст фыццаг сахуыр кæнын роботтæ æмбырд кæнын, уый фæстæ та сын программæтæ кæнын.
Нымæцон интерактивон лаборатори «Экспериментируем» сывæллæтты рæвдауæндоны байгом ацы аз. Ам сывæллæтты уыцы иу рæстæг ахуыр кæнынц цалдæр къабазмæ гæсгæ: 3Д моделировани, программæтæ кæнын, робототехникæ, фæлварæн-эксперименталон архайд.
Ифтонггæрзтæ кæд ног сты, куыд сывæллæттæн, афтæ педагогтæн дæр, уæддæр, сыл цыбыр рæстæгмæ сахуыр сты кусын. Хъомылгæнджытæ ацыдысты сæрмагонд цæттæдзинад, цæмæй рæзгæ фæлтæримæ иу æвзагыл дзурой – инновациты æвзагыл.
Лабораторийы ногдзинæдтæй иу у хъæлæсон комплекс «Наум». Рæвдауæндоны йæ схуыдтой Бибо. Иртасы ныхас, йæ бон у 200 цæсгомы онг бахъуыды кæнын, экскурси саразын, дзуапп дæтты фæрстытæн. Бибо – хуымæтæг робот нæу, фæлæ æцæг æххуысгæнæг хъомылгæнджытæн, сывæллæттæн та – æмбал.
Лабораторийы ахуырад у алывæрсыг. Сывæллæттæ зонгæ кæнынц аивадимæ, технологиимæ æмæ æрдзон наукæтимæ. Æххуыс сын кæнынц нырыккон ифтонггæрзтæ. Лабораторийы архайы 175 сывæллоны. Педагогтæ куыд зæгъынц, афтæмæй ахæм ахуыртæ иттæг хорз ахадынц логикæйы, ныхасы рæзтыл æмæ командæйы куыстыл. Æмæ ма ахсджиаг у, рæвдауæндон йæ фæлтæрддзинад кæй æвдисы федералон æмвæзадыл дæр.
Хъазты хуызы сывæллæттæ зонгæ кæнынц фидæны дæсныйæдтимæ. Сабибонтæй хъомылгæнинæгтæм фидар кæнынц сæйрагдæр æууæлтæ – цымыдисдзинад ног зонындзинæдтæ исынмæ æмæ сæм фаг хъарутæ кæй ис, уый ныфс.
