300 архайæджы æмæ 30 ансамблæй фылдæр ссыдысты Уæрæсейы алы регионтæй
Дзæуджыхъæуы дыккаг хатт цæуы национ культурæты æппæтадæмон инклюзивон фестиваль «Алтын Майдан»-Алани. 300 архайæджы æмæ 30 ансамблæй фылдæр ссыдысты Уæрæсейы алы регионтæй. Мадзал у ахсджиаг, уымæн æмæ сфæлдыстадон программæты баиу вæййынц алыхуызон адæмы хæттытæ, стæй дзы бацархайæн ис, се нæниздзинад хъыгдард кæмæн у, уыдонæн дæр. «Алтын Майдан»-ы архайджытимæ базонгæ не сфæлдыстадон къорд дæр.
Екатерина Воробьева Волгоградæй Дзæуджыхъæумæ ссыди дыккаг хатт. Фестиваль «Алтын Майдан»-ы адæмы зонгæ кæны гальваникæйы аивадимæ. Згъæр цъар цы æрдзон æрмæгыл сæвæры, уыдонæй уый фæстæ рауайы рæсугъд аивгæнæнтæ. 2013 азæй фæстæмæ чызг у проекты активон архайæг.
Цæгат Ирыстонмæ æрбацыдысты 30 коллективæй фылдæр, цæмæй сæ дæсныйад равдисой, уый тыххæй. Сфæлдыстадон ансамбльтæ Уæрæсейы 20 регионтæй бацархайдзысты национ культурæты æппæтадæмон инклюзивон фестиваль «Алтын Майдан» Аланийы.
«Сыгъзæрин фæз» кæнæ «Алтын Майдан» 13 азы размæ сæвзæрд Татарстаны. Фæкæнынц æй регионты. Интернационалон культурон – рухстауæн проект арæзт у Уæрæсейы адæмты фольклор æмæ традицитимæ зонгæ кæныны тыххæй хореографион равдыстыты, национ зарджыты æмæ этникон уæлæдарæсты фæрцы.
Фестиваль Цæгат Ирыстоны цæуы дыккаг хатт. Гом у алкæмæн дæр. Бацархайæн дзы ис, се нæниздзинад хъыгдард кæмæн у, уыцы адæмæн дæр. Программæ у тынг хъæздыг. Къуырийы дæргъы архайджытæн сараздзысты дасныйадæвдисæг ахуыртæ æмæ хæрзаудæн концерттæ. Конкурсты ансамбльтæ равдисдзысты сæ традицитæ æмæ культурæ. Уымæй уæлдай ма республикæйы уазджыты базонгæ кæндзысты Ирыстоны рæсугъдзинадимæ. Сфæлдыстадон программæйы фæстаг бон та сараздзысты Гала – концерт.
Цæгат Ирыстон сси проекты æмбал. Йæ саразджытæ фæнд кæнынц фестиваль аразын нæ республикæйы алы аз, фæззæджы.
