Афæдзы кæронмæ фæнд кæнынц 20 уынгæй фылдæр рацаразын.
Дзæуджыхъæуы дæр цæуынц фæндæгты цалцæггæнæн куыстытæ. Афæдзы кæронмæ фæнд кæнынц 20 уынгæй фылдæр рацаразын. Ивынц фæндæгты уæлцъар, æвæрынц дзы бордюртæ, уæрæхдæр кæнынц къахвæндæгтæ. Фæндæгтæ ног кæныны куыстытæ парахат кæй сты, уымæ гæсгæ, æхсæнадон транспорты маршруттæ дæр ивд æрцыдысты. Горæты уынгтыл æрзылди не сфæлдыстадон къорд, æмæ темæ дарддæр ахæццæ кæндзæн Сокаты Фатимæ.
Фæндаджы ацы уаццаг горæты цæрджытæн бирæ къуылымпыдзинæдтæ бавзарын кодта. Бирæ рæстæг уыди æдзæллаг уавæры. Ныртæккæ куыст цæуы, Калинины уынджы æмæ Къостайы проспекты тигъы фæндаг сног кæныныл. Бындурон цалцæггæнæн куыстытæ райдыдтой ацы сæрды райдиан. Ам æххæстæй ивынц трамвайты рельсытæ æртæ сæдæ метрæй фылдæр. Фæндæгтæ аразджыты размæ вæрд ис, афоныл объект эксплуатацийы раттыны хæс. Фæлæ сæ размæ ис къуылымпыдзинæдтæ дæр.
Къостайы проспекты фæндаджы иннæ уаццаг – Мамсыраты Хаджумары уынгæй Барбашовы уынгмæ фæндаджы рацарæзт кæронмæ фæхæццæ кæны. Тагъд трамвайтæ рацæудзысты ног рельсытыл. Фæндагыл цæуыны фæтк æмæ гæнæнтæ бæлвырд фенцондæр уыдзысты.
Куыстытæ уыцы-иу рæстæг цæуынц цалдæр раны. 10 уынгæй фылдæр сты æхгæд. Шофыртæ æмæ фистæгæйцæуджыты хъæуы æндæр фæндæгтæ агурын.
Горæты фæндæгтæ цалцæггонд цæуынц национ проекты фæлгæты. Æххæстгонд цæудзæни дыууæ мины дыууын цыппæрæм азмæ. Ацы аз программæмæ хаст æрцыдысты дыуын аст уынджы, сæ фылдæр сты уæрæх. Специалисттæ арæзтадон куыстыты размæ æркастысты фæндæты уавæрмæ, сæ уæлцъармæ, куыд арæх сæ пайда кæнынц, уымæ, стæй горæты цæрджыты курдиæттæм.
Ныридæгæн конд у иннæ азы арæзтадон куыстыты пълан дæр. Стыр рацарæзт уыдзæни Чапаевы, Ардонскийы æмæ Шмулевичы уынгтыл. Куыстытæ цæудзысты Къостайы проспекты иннæ уаццагтыл дæр.
