Ирон театрдзаутæ академион уырыссаг театры федтой 3 постановкæйы
Дзæуджыхъæуы цæуынц Смоленскы Грибоедовы номыл паддзахадон драмон театры «Стыр гастрольтæ». Ирон театрдзаутæ академион уырыссаг театры федтой 3 постановкæйы: Чеховы уацмыстæм гæсгæ «О, женщины», «Его донжуанский список» æмæ сывæллæтты аргъау «Али-баба». Адæмы размæ ма рахастой спектакль «Судьба человека». Уæвгæ, Смоленскы театр фыццаг хатт ссыд Дзæуджыхъæумæ. Чехойты Фатимæ радзурдзæн бæстондæр.
Дон Жуаны хъуыдытæ уарзондзинады тыххæй. Алы хабар дæр – æнкъарæнты дуне. Сæ зæрдæтæм сæ айстой æрмæст персонажтæ нæ, фæлæ постановкæ «Его донжуанский список» бакæсынмæ чи *рбацыд, уыцы театрдзаутæ дæр.
Спектакль æвæрд æрцыд Валентин Красногоровы пьесæмæ гæсгæ. Сæ цард баиу кæнын чи сфæнд кодта, уыцы Олег æмæ Наташæ хъуамæ сæ чындзæхсæвмæ æвдисæнæн *рбахоной ацæргæ нæлгоймаджы. Куыд рабæрæг, афтæмæй уый йе*рыгон бонты уыд Дон Жуан. Олег æй, зæрдæ бахъæлдзæг кæнынæн куры, цы сылгоймæгтимæ зонгæ уыд, уыдоны тыххæй радзурын. Уыцы бонæй фæстæмæ æрыгæтты *хсæн ахастдзинæдтæ лæгъз нал уыдысты, фæстагмæ та бынтон фехæлдысты. Пьесæйы æвдыст цæуынц æнæнхъæлæджы цаутæ. Йæ кæрон усгур æмæ æвдисæн сæ бынæттæ баивтой. Хъайтарты хъысмæт фендæрхуызон.
Грибоедовы номыл Смоленскы паддзахадон драмон театр спектакль «Его донжуанский список» хуымæтæджы нæ равзæрста. У режиссер-æвæрæг æмæ артист Игорь Голубевимæ баст истори. Фыццаг хатт архайы ацы постановкæйы. Йæ ныхæстæм гæсгæ, театры репертуармæ спектакль бахаста куыд режиссер нæ, фæлæ куыд уарзон уацмысы персонажы роль йæхиуыл абарын кæй бафæндыд, ахæм актер.
Цæгат Ирыстонмæ Смоленскы театр ссыд фыццаг хатт. Æппæтуæрæсеон программæ «Большие гастроли» æххæстгæнгæйæ, бæстæйы зæронддæр театры сфæлдыстадон коллектив адæмы размæ рахаста спектакльтæ «О, женщины» æмæ «Его донжуанский список». Аивадуарзджытæм ма æнхъæлмæ кæсынц постановкæтæ «Судьба человека» æмæ аргъау «Али-баба». Смоленскы театры артистты æмæ разамонджыты цæгатирыстойнаг театрдзауты ахаст сæ зæрдæтæ балхæдта æмæ сæ сразæнгард кодта фидæны нæ республикæмæ ссæуынмæ.
Александр Грибоедовы номыл Смоленскы театр цæгатирыстойнаг аивадуарзджытæн лæвар кæны, адæм бирæ азты сæ зæрдæты цы æнкъарæнтæ дардзысты, ахæмтæ.
Аивады *мбарынад алы театрæн дæр у хицæн. Бæстæйы театрты постановкæтæ фенгæйæ театрдзаутæ базонынц æмæ банкъарынц бирæ ногдзинæдтæ.
