Бронзæйæ монумент æвæрд æрцыди Коцойты Арсены уынджы Терчы фæлладуадзæн зонæйы
Дзæуджыхъæуы цыртдзæвæн байгом кодтой легендарон арктикон капитан Кучиты Юрийæн. Бронзæйæ монумент æвæрд æрцыди Коцойты Арсены уынджы Терчы фæлладуадзæн зонæйы. Ацы хъæппæрис разынди æхсæнадон змæлд «Нацийы æнæниздзинад» йæ сæргъы Фадзайты Арсен, афтæмæй. Ацы фæндон хорзыл банымадтой Дзæуджыхъæуы администрацийы æмæ Уæрæсейы дизайнерты Цæдисы. Афæдзы размæ расидтысты скульптурæйы хуыздæр эскизы конкурс. Уыди æртæ къæпхæнæй, æмæ дзы сæ куыстытæ адæмы размæ рахастой 30 авторы. Жюрийы уæнгтæ, се хсæн ирон нывкæнынады ирддæр архайæг Бедойты Шалва æмæ Уæрæсейы нывкæнынады академийы академик Александр Апаллонов, хуыздæр куыстыл банымадтой зындгонд скульптор Кучиты Асланы эскиз. Йæ ныхæстæм гæсгæ, йын уыди æнцон кусæн, уымæн æмæ Кучиты Юрийы зыдта. Скульптурон композицийы арктикон капитан лæууы ледоколы штурвалы цур, йæ къухы бинокль, афтæмæй. Æрхъуыдыдзинад у тынг цымыдисаг, стæй йæ цæстæнгасы ирдæй зыны не мзæххоны фидар удыхъæд. Цыртдзæвæн конд у бронзæйæ. У 3 метры бæрзæндæн. Авторы хъуыдымæ гæсгæ, ма скульптурæ хъуамæ уæлдай хатт дзурæг уа Арктикæ чи басаста, уыцы легендарон Кучиты Юрий дунейæн цы стыр хæрзты бацыди, ууыл.
