Архайдтой дзы 300 спортсменæй фылдæр Уæрæсейæ æмæ Белоруссийæ
Дзæуджыхъæуы спортивон хъæбысхæстæй цæттæдзинады тренировкæгæнæн центры уыд Годжиаты Владимиры номарæн Æппæтуæрæсеон турнир фехтованийæ. Архайдтой дзы 300 спортсменæй фылдæр Уæрæсейæ æмæ Белоруссийæ. Цæгат Ирыстоны кад дзы хъахъхъæдтой 70 спортсмены. Уæлахиздзауты æмæ призерты схорзæхджын кодтой кады гæххæттытæй, майдантæй æмæ æхцайы премитæй. Чехойты Фатимæйæн ныхасы бар.
Къалаты Вероникæйы зæрдæйы фехтованимæ цымыдисдзинад фæзынд, Гаглойты Валерийы чиныг бакæсгæйæ. Ныр чызгыл цæуы 17 азы æмæ у Уæрæсейы спорты мастер. Вероникæ 69 цæгатирыстойнаг спортсментимæ архайы æппæтадæмон къæпхæны спорты мастер Годжиаты Владимиры номарæн æппæтуæрæсеон ерысты. Турнир цæуы, национ проект «Демографи»-йы федералон проект «Спорт-царды нормæ» æххæстгæнгæйæ, спортивон хъæбысхæсты цæттæдзинадæн цы центр сарæзтой, уым.
Ерысты архайынц 300 адæймагæй фылдæр Уæрæсейы 20 регионтæй. 15-аздзыд Каролина Романкова ацы спроты хуыз равзæрста, тренертæй иу астæуккаг скъолайы ахуырдзаутæн цы дæсныйадæвдисæг ахуыр сарæзта, уый фæстæ. Ныр 6 азы дæргъы Каролинæ арæхстджынæй архайы шпагæимæ. Йæ ныхæстæм гæсгæ, алы ног ерысы архайд ын у стыр спортмæ къахдзæф.
Тренировкæтæ, ерыстæ æмæ та ног тренировкæтæ. Спорсмены фæндаг æнцон нæу, фæлæ фехтованимæ уарзондзинад дæтты ног тыхтæ зындзинæдты сæрты хизынæн.
Годжиаты Владимиры номарæн турнир аразджытæ сты республикæйы физкультурæ æмæ спорты министрад æмæ фехтованийы цæгатирыстойнаг Федераци. Уæлахиздзаутæ æмæ призертæ хорзæхджынгонд æрцæудзысты кады гæххæттытæй, майдантæй æмæ кубоктæй. Спортсменты ныхæстæм гæсгæ, фæлтæрддзинад у ерысты архайды сæйраг нысан. Фæлæ сæ уæддæр алчидæр тырны уæлæхиздзау суæвыныл.
