Республикæйы сæйраг сахарыл сæххæст 240 азы
Дзæуджыхъæуы уыд горæты бон. Республикæйы сæйраг сахарыл сæххæст 240 азы. Уый кадæн горæты алы фæзты арæзт æрцыдысты бæрæгбоны мадзæлттæ. Программæйы – ирон чъириты æмæ физонджыты фестивальтæ, национ-культурон æхсæнадты равдыстытæ, дæсныйадæвдисæг ахуыртæ, квесттæ. Уыдис алыхуызон ерыстæ. Бæрæгбоныл афæлгæст Чехойты Фатимæ.
Сабырдзинады проспекты æмæ Хетæгкаты Къостайы номыл фæлладуадзæн парчы ацыдысты бæрæгбоны сæйраг мадзæлттæ. Музыкæйы зæлтæ, ирхæфсæн бынæттæ, спортивон ерыстæ – алы мадзал дæр уыд арæзт, адæмы бахъæлдзæг кæнынæн æмæ сын сæ зæрдæты рæсугъд фæд ныууадзынæн. Ленины номыл фæзы арæзт æрцыдысты ерыстæ баскетболæй æмæ национ хъæзтытæй.
Дæсныйад æвдисæг ахуыртæ къултыл нывтæ кæнынæй, сывæллæты ирхæфсæн бынæттæ, хæстон техникæйы равдыст – алы адæймаг дæр ссардта зæрдæмæ хæстæг мадзал. Æнæ ирон чъиритæй цавæр бæрæгбон фидауы. Национ музейы кæрты сарæзтой гастрономон фестиваль.
Фæлладуадзæн парчы та æрбынат кодтой æрыгон шахматисттæ – 9 азы онг кæуыл цæуы, ахæм лæппутæ æмæ чызджытæ. Æдæппæтæй турниры архайдтой 15 сывæллоны.
2 æнусæй фылдæр рацыд горæты равзæрдæй. Дзæуджыхъæу – республикæйы сæйраг горæт, Хæстон намысы горæт , æнгомæй дзы цы бирæ адæмы хæттытæ цæры, уыдоны райгуырæн зæхх сси Уæрæсейы хуссар хайы культурон центр. Нырыккон арæзт хæдзæрттæ, аив уынгтæ æмæ Терчы рæсугъд былгæрæттæ – Дзæуджыхъæу бонæй бон рæсугъдæр кæны.
Сæрибары фæзы Дзæуджыхъæуы 240 азы кадæн арæзт æрцыд бæрæгбоны концерт. Нæ республикæйы сæйраг горæтимæ баст сты Хетæгкаты Къостайы, Евгений Вахтанговы æмæ Михаил Булгаковы нæмттæ. Йæ растæджы ам уыдысты Пушкин, Лермонтов æмæ Грибоедов. Бирæ æнусты рæсугъдæй цæр, нæ уарзон Дзæуджыхъæу!
