Спектакль æвæрд æрцыд Цæгат Ирыстоны аивæдты сгуыхт архайæг Плиты Жаннæйы ном ссарынæн
Дзæуджыхъæуы уыд Хетæгкаты Къостайы поэмæмæ гæсгæ æвæрд балет «Фатимæ»-йы премьерæ. Се ппæт дæр кæй зонынц, уыцы истори ацы хатт равдыстой кафты фæрцы. Спектакль æвæрд æрцыд Цæгат Ирыстоны аивæдты сгуыхт архайæг Плиты Жаннæйы ном ссарынæн. Уый музыкæ зæлы спектаклы. Режиссер у Дзудцаты Тамерлан, сæйраг балетмейстер – Суанты Валерий. Йæ автор æмæ аивадон разамонæг та у Уæрæсейы адæмон артист Гергиты Валерий. Мариинаг театры цæгатирыстойнаг филиалы бæрзонд аивады бæрæгбон куыд ацыд, уый тыххæй радзурдзæн Фидараты Маринæ.
Уарзондзинады æмæ уды хъуырдухæнты истори. Рагæй кæмæ æнхъæлмæ кастысты, уыцы постановкæ «Фатимæ» Мариинаг театры филиалы сценæйы. Хетæгкаты Къостайы æнæмæлгæ поэмæ ныр ног хуызы, ирд ахорæнтæй ахуырст. Сæйраг хъайтары сурæт йæхиуыл сбарста Мариинаг театры цæгатирыстойнаг филиалы прима-балеринæ Виолетта Магомедханова.
Иннæ сæйраг хъайтар – æххуырст Ибаргим. Бирæ азты æгæрон уарзтæй уарзы къниазы хæсгæ чызг Фатимæйы. Æмæ куы айхъуыст, йæ цардæмбал Дзамболат зæгъгæ, хæсты фæмард, уæд Ибрагимæн бантыст Фатимæйы зæрдæмæ фæндаг ссарын. Уыцы роль йæхиуыл сбарста Мариианг театры филиалы балетон труппæйы солист Осман Рустамов.
Проектыл кусын райдыдтой афæдзы размæ. Уыцы хъæппæрисы автор уыд Мариинаг театры аивадон разамонæг æмæ генералон директор Гергиты Валерий. Уæлдайдæр та Хуссар Ирыстоны адæмон артисткæ, композитор Плиты Жаннæйы музыкæ куы фехъуыста, уæд. Костюмтыл æмæ декорацитыл бакуыста театры республикон филиалы сæйраг нывгæнæг Найфонты Давид. Уæвгæ, национ костюмтæ балетæн хуымæтæг хъуыддаг нæу. Фæлæ уыдонæй дæр сфидыдта ацы постановкæ.
Балет “Фатимæ”-йы премьерæ дисы бафтыдта се ппæты дæр. Билеттæ æлхæд æрцыдысты, премьерæмæ ма къуыри куы баззад, уæд. Ног постановкæйæн аккаг аргъ скодта республикæйы Сæргълæууæг. Сергей Меняйло йæ телеграмм-каналы раарфæ кодта Гергиты Валерийæн, нæ республикæйы культурæйы рæзтмæ ахæм æгæрæон æвæрæн кæй хæссы, уый тыххæй. Зæрдæбын арфæтæ ракодта, постановкæйыл чи бакуыста, уыдонæн се ппæтæн дæр. Балет «Фатимæ» у нæ культурон царды ирддæр цау. Уымæн æвдисæн дыууæ боны премьерæйы адæмæй къух бакæнæн кæй нæ уыд, уый.
Мариианг театры филиалы сæйраг балетмейстер Суанты Валерий балет “Фатимæ” фæнд кæны Мæскуыйы æмæ Санкт-Петербурджы сценæты сæвæрын. Кæй зæгъын æй хъæуы, постановкæ фендзысты композитор Плиты Жаннæйы райгуырæн Цхинвалы дæр.
