Аивадуарзджыты зæрдæтæ барухс кодтой классикон æмæ ирон авторты ног композицитæй
Дзæуджыхъæуы уыд музыкалон фестиваль «Джаз – 2026″. Аивадуарзджыты зæрдæтæ барухс кодтой классикон æмæ ирон авторты ног композицитæй. Дирижер æмæ амонæг уыд Уæрæсейы аивæдты сгуыхт архайæг, Цæгат Ирыстоны адæмон артист, композитор Къæбойты Николай. Бæлвырддæр хабæрттæ радзурдзæн Куыдзиаты Алинæ.
Джазы зæлтæ æвдисæг сты сæрибары æмæ импровизацийы бастдзинад. Цæгат Ирыстоны паддзахадон университеты концертон зал та ногæй сæмбырд кодта, джазы аивад зынаргъ кæмæн у, ахæм курдиатджын музыкантты. Ацы фестиваль у традицион, адæмæн фехъусын кодтой сæ зындгонддæр композицитæ. Джаз равзæрд Ног Орлеаны, уый афроамерикайнæгтæн у сæ бынæттон традици. Сæхи ныхæстæм гæсгæ джаз кæлы сæ тугдадзинты. Ацы аз фестивалы уазæг уыд Моник Би Томас – джазы æмæ блюзы зындгонд зарæггæнæг. Йæ ном джазы сфæлдыстады у стыр дамгъæйæ фыст. Моникæн æгас дунейы вæййы гастрольтæ, æмæ дзы адæм ацæуынц зæрдæрайгæйæ.
Ацы мадзалмæ ма хунд æрцыдысты зындгонд пианист Алексей Черемизов æмæ тромбонист Евгений Белин. Андреа Бочеллийы композициимæ сценæмæ рацыдысты Гергиты Валерийы номыл паддзахадон колледжы эстрадон хайады студенттæ.
Фестиваль «Джаз 2026» у бæрæгбоны хуызы. Æрвылаз æнæмæлгæ уацмысты зæлтæм йæ райгуырæн бон сбæрæг кæны Суанты Кимы номыл паддзахадон эстрадон национ оркестр.
Джаз уарзджытæ ацы изæр сæ хæдзæрттæм ацыдысты цины æнкъарæнтæй дзагæй. Хистæр кары адæмæй фæстæмæ ма дзы уыд сывæллæтæ дæр.
Джазмæ уарзондзинад у фæлтæрты бастдзинадæн æвдисæн. Цалынмæ зæлы ирд музыкæ, уæдмæ аивадуарзджыты зæрдæтæ дзаг кæндзысты рæсугъд æнкъарæнтæй.
