Конференцийы ма æвзæрст æрцыд «Номарæн»-ы ног сæрдар
Цæгат Ирыстоны гуманитарон æмæ социалон ртæстыты институты уыд пенсиисджыты æмæ политикон репресситы амæттæгты хæрзаудæн организаци «Номарæн»-ы 10-æм конференци. 30 азæй фылдæр организацийæн разамынд лæвæрдта нæ республикæйы зындгонд æхсæнадон архайæг Зураты Ауызби. Йæхиуыл дæр бавзæрста репресситы фæд. Уыдис æм бирæ хицауадон æмæ æхсæнадон хæрзиуджытæ. Зæгъын хъæуы уый, æмæ цæгатирыстойнаг организаци Уæрæсейы нымад æрцыд хуыздæртæй иуыл. Йæ разамонæг та уыд политикон репресситы æппæтадæмон æмæ æппæтуæрæсеон ассоциациты уæнг. Ауызби рауагъта 7 чиныджы. Се ппæт дæр баст уыдысты ахсджиаг темæтимæ. Конференцийы архайджытæн раарфæ кодта нациты хсæн ахастдзинæдты фарстаты фæдыл министр Цуциты Аслан. Фæстæдæр байхъуыстой бæстон докладмæ, ивгъуыд азты куысты тыххæй. Æмбырды амонæг Хъайтыхъты Тамарæ организацийы разамынды номæй арфæйы фыстæджытæ радта мидхъуыддæгты министрады, æдасдзинады федералон службæйы, прокуратурæйы, архивон службæйы коллективтæн. Конференцийы ма æвзæрст æрцыд «Номарæн»-ы ног сæрдар. Уыцы хæстæ æххæст кæндзæн Цæгат Кавказы хæххон металлургон институты доцент Зураты Аркадий. Уый хорз зоны репресситы амæттæгты фарстатæ. Бирæ азты лæууыди Ауызбийы фарсмæ.
