Уый у æрвылазон конкурс
Адæмы традицион хæзнатæ æмæ культурæ. Дзæуджыхъæуы уыд республикон конкурсы финал «Ирон дæн æз». Уый у æрвылазон конкурс. Арæзт цæуы æхсæнадон организаци «Иудзинад»-ы хъæппæрисæй, республикæйы ахуырады æмæ наукæйы министрадимæ иумæ. Финалы сæ арæхстдзинад æвдыстой æппæт республикæйæ чызджытæ æмæ лæппутæ – районты цы фыццаг къæпхæнтæ ацыдысты, уыдоны уæлахиздзаутæ. Конкурсы архайдтой ирон æвзагыл чи дзуры, истори, культурæ æмæ традицитæ хорз чи зоны, уыцы хистæркъласонтæ. Финалон ерысты конкурсанттæ радзырдтой сæ мыггæгты историйы, национ бæрæгбæтты равзæрды тыххæй, равдыстой ирон адæмон кæфтытæ, акодтой зарджытæ. Рæзгæ фæлтæры зонындзинæдтæн æмæ арæхстдзинадæн аргъ кодтой ахуырады æмæ наукæйы министрады, æхсæнадон змæлд «Аланты Ныхас»-ы минæвæрттæ, культурæйы архайджытæ.
