Уый уыд дохтыр-хирург, профессор, æфсæддон-быдырон хирургийы æмæ анестезийы уæрæсейаг скъолаты бындурæвæрæг
Дзæуджыхъæуы Весеннийы уынджы клиника «Здоровье»-йы раз фæзы байгом Николай Пироговы бюст. Уый уыд дохтыр-хирург, профессор, æфсæддон-быдырон хирургийы æмæ анестезийы уæрæсейаг скъолаты бындурæвæрæг. Ацы хъуыддаг сæххæст кæныны хъæппæрис разынд республикæйы Парламенты депутат Гæбæраты Юримæ. Кадджын мадзалы архайдтой сенатор Виталий Назаренко, Парламенты, Хицауады, Дзæуджыхъæуы администрацийы, медицинон æхсæнады минæвæрттæ. Æрбацæуæг адæмæн раарфæ кодта спикер Тускъаты Таймураз. Куыд загъта, афтæмæй Николай Пирогов медицинæйы райрæзтмæ цы æвæрæн бахаста, уымæн æмбæлгæ аргъ скæнын зын у. 1847-æм азы зындгонд хирург ссыд Кавказмæ æфсадмæ. Фæндыдис æй, цы ног операцион методтыл бакуыста, уыдон быдырон уавæрты сбæлвырд кæнын. Хирургæй куыста Дзæуджыхъæуы фидары. Николай Пироговы бюст сцæттæ кодта скульптор Хайты Ибрагим.
