Зынгсирвæзтыты рæстæг специалистты раст æмæ ахадгæ архайдæй аразгæ у адæмы цард
Дзæуджыхъæуы зынгхуыссынгæнæн-ирвæзынгæнæн гарнизоны специалисттæ ахуыртæ скодтой бирæуæладзыгон хæдзæрттæй иуы. Зынгсирвæзтыты рæстæг специалистты раст æмæ ахадгæ архайдæй аразгæ у адæмы цард. Бирæуæладзыгон хæдзæртты зынгсирвæзт ахуыссын кæныны процессы ис бирæ фæзилæнтæ. Хъæуы дзы бæрнондзинад. Хæдзар бæрзонд кæй у, уый, фатерты пълан, коммуникацитæ, электрон тыхдæттæг кусæнгæрзтæ, артаг, хæтæлтæ, хæдзары дзаумæттæ. Æппæт ацы хъуыддæгтæ къуылымпыдзинæдтæ æвзæрын кæнынц ирвæзынгæнджыты куыст. Сæ сæйрагдæр нысан – адæмы цард бахъахъхъæнын. Ахæм ахуырты рæстæг специалисттæ бафтауынц сæ фæлтæрддзинадыл, стæй ахуыр кæнынц командæйы кусыныл. Ацы хатт, æрхъуыдыгонд цаумæ гæсгæ, зынг сирвæзт хæдзары 13-æм уæладзыджы. Æвæстиаты хъусынгæнинаджы фæстæ бынатмæ æрбацыдысты фыццаг дæлхайæдтæ æмæ райдыдтой арт хуыссын кæнын, стæй адæмы эвакуаци кæнын. Æртæйæ, се хсæн сывæллон, баззадысты фыдбылызы бынаты. Специалисттæ сæвæрдтой даргъ асин, æмæ уый фæрцы адæмы ракодтой æдас ранмæ.
