Уый у проектон документ, æмæ йæ бындурыл цæуы горæты уынгты арæзтад
Дзæуыджыхъæуы администрацийы æхсæнады размæ рахастой горæты генералон пъланмæ цы ивддзинæдтæ бахæссынмæ хъавынц, уыдон. Уый у проектон документ, æмæ йæ бындурыл цæуы горæты уынгты арæзтад. Дзæуыджыхъæуы генералон пълан сфидар кодтой 2011-æм азы. Фæстаг хатт æм ивддзинæдтæ бахастой 2022-æм азы декабры. Документы бæрæггонд сты эксплуатацимæ кæй радтой, уыцы объекттæ, стæй хæстæгдæр азты дæргьы кæй сараздзысты, уыдон дæр. Генералон пъланмæ бахастой скъолаты, рæвдауæндæтты, клубты, рынчындæтты æмæ æндæр социалон объектты арæзтад æмæ рацарæзт. Доны станцæмæ хæстæг территорийы рæхджы царды уадзын райдайдзысты инвестицион проект. Уым арæзт æрцæудзæн фысымуæтты комплекс æмæ аквапарк. Инвестицион компанийы минæвар Хъамболты Виктор куыд радзырдта, афтæмæй куыстытæ райдайдзысты хæстæгдæр рæстæг.
