Мадзал сарæзтой ирон æвзаг æмæ литературæйы боны кадæн
Дзæуыджыхъæуы кадджын уавæры хорзæхджын кодтой республикон преми Ирыстонмæ уарзондзинады лауреатты. Мадзал сарæзтой ирон æвзаг æмæ литературæйы боны кадæн. Мадæлон æвзагыл чи фыссы, уыцы журналисттæн дипломтæ æмæ æхцайы призтæ радта республикæйы хицауады сæрдар Дзанайты Барис. Раарфæ кодта конкурсы уæлахиздзаутæн. Куыд æрвылаз, афтæ ацы хатт дæр уæлахиздзауты сбæрæг кодтой цалдæр номинацийы. Мыхуыры æрмæджыты номинацийы лауреат сси горæты центрон библиотекæйы бæстæзонынады сæргълæууæг Дзугаты Риммæ. Радио æрмæджыты номинацийы раззагдæр сси не мкусæг, паддзахадон телерадиокомпани «Аланийы» радиойы службæйы амонæг Налдыхъуаты Зæлинæ. Телеуынынады къабазы хуыздæрыл банымадтой национ телеуынынад «Осетия Ирыстон»-ы редактор Зыхъуаты Жаннæйы. Интернеты мыхуыргонд æрмæджыты номинацийы уæлахиздзау сси информацион портал «15-æм регионы» сæйраг редактор Колыты Людмилæ. Номинаци афæдзы темæйы та сывæллæтты журнал «Ногдзауы» сæйраг редактор Сæлбиты Дианæ. Зæгъдзыстæм ма уый дæр, æмæ ацы аз снысан кодтой сæрмагонд номинаци «Афæдзы темæ». Баст у Хетæгкаты Къостайы райгуырды 165 азы бонимæ.
