Арæзт уыд видеоконференцийы хуызы, æмæ йæ амыдта Уæрæсейы экономикæйы министры хæдивæг Сергей Назаров
Хицауады Сæрдар Дзанайты Барис архайдта, Кавказы инвестицион форуммæ цæттæ кæныны кусæг къорды æмбырды. Арæзт уыд видеоконференцийы хуызы, æмæ йæ амыдта Уæрæсейы экономикæйы министры хæдивæг Сергей Назаров. Форум ацæудзæн бирæвæрсыг равдыстадон центр «МинводыЭкспо»-йы 25-æмæй – 27-æм майы онг. Йæ сæйраг нысан у – Цæгат Кавказы инвестицион хъомыс фæфылдæр кæнын, æмæ регионы социалон-экономикон рæзтыл кусын. Ацы аз сæйраг темæ уыдзæн ивестицион фæндаг: «Ивгъуыд. Ныртæккæ. Фидæн». Мадзалы архайдзæн 5000 адæймаджы. Уыдон уыдзысты паддазхадон хицаудзинады орæгнты минæвæрттæ, уæрæсейаг æмæ æппæтадæмон компаниты менеджертæ, наукон æмæ экспертон æхсæнады уæнгтæ. Иууылдæр иумæ ныхас кæндзысты амалхъомдзинады, агропромышленнон комплексы, энергетикæйы, транспорты, туризмы, æнæниздзинадхъахъхъæнынады рæзтыл, стæй æппæтдунеон æмгуыстадыл. Форумы фæткы уыдзысты пленарон æмбырдтæ, тематикон сесситæ, дискусситæ æмæ ахсджиаг фембæлдтытæ. Нæ республикæ Цæгат Кавказы федералон зылды иннæ регионтимæ аразы форуммæ цæттæгæнæн куыст. Кавказы инвестицион форум хорз фадат ратдзæн нæ регионы хъомыс равдисынæн, æмæ йæ дарддæры рæзтыл архайынæн. Форум арæзт фæцæуы 2023-æм азæй фæстæмæ, Уæрæсейы Президенты указмæ гæсгæ. Зæгъдзыстæм ма уый дæр, æмæ дыууæ азмæ Цæгат Ирыстон форумы бафыста æмгуыстады 13 бадзырды.
