Дыккаг аз фæд-фæдыл организаци Уæрæсейы нымад æрцыд хуыздæрыл
Дзанайты Барис бабæрæг кодта центр «Мой бизнес». Дыккаг аз фæд-фæдыл организаци Уæрæсейы нымад æрцыд хуыздæрыл. Иу фæзы æрæмбырд кодтой амалхъомдзинадæн баххуыс кæныны æппæт инфраструктурæ æмæ институттæ. Премьер æркасти центры офистæм, аныхас ын кодта йæ кусджытæ æмæ æрбацæуджытимæ. Куыд ын фехъусын кодтой, афтæмæй адæмы хсæн ахадгæ дæр у гыццыл проценттæ кæм вæййы, ахæм æфстæуттæ. Экономикон архайды æппæт хуызтæн сæ проценттæ 3% онг фæкъаддæр кæныны фæндон рахаста республикæйы Сæргълæууæг. Йæ нысан уыди санкциты рæстæг амалхъом адæмæн баххуыс кæнын. Центры размæ ис хæс- бизнесы куыст фæхуымæтæгдæр кæнын, адæмæн æппæт бюрократон фæзилæнты тыххæй бамбарын кæнын. Уымæй уæлдай æххуыс кæны республикæйы мæгуырдзинады ныхмæ тох кæныны программæйы чи архайы, уыдонæн. Ныридæгæн бацæттæ кодтой 7 сæдæ бизнес-пъланæй фылдæр. Социалон контракт бафыссыны фæстæ, адæмæн æххуыс кæнынц хыгъды ныллæууын, æмæ сæм уый фæстæ сæ цæст фæдарынц æппæт къæпхæнты сæ бизнес райрæзын кæнынæн.
