Курдиæттæ баст уыдысты хъæуты æмæ хицæн объектты аивдзинадимæ, ахуыргæнæндæтты æмæ фæндæгты уавæримæ, адæмы хостæй ифтонг кæныны хъуыддагимæ
Дзанайты Барисæн фембæлд уыди цæрджытимæ. Профилон министртимæ, муниципалитетты разамонджытимæ æмæ комитетты минæвæрттимæ Президенты исæнуаты ныхас цыди республикæйы цæрджыты риссагдæр фарстатыл. Курдиæттæ баст уыдысты хъæуты æмæ хицæн объектты аивдзинадимæ, ахуыргæнæндæтты æмæ фæндæгты уавæримæ, адæмы хостæй ифтонг кæныны хъуыддагимæ. Афтæ, Алагиры цæрæг Сохиты Фатимæ æрбацыди Фæскомцæдисонты уынджы фæзы аивдзинады фарстаимæ. Алагиры районы администрацийы сæргълæууæг Дзантиаты Ислам ын зæрдæ бавæрдта, программæ «Горæты æнцонвадат царды» фæлгæты, хæстæгдæр дыууæ азы кæй фæнд кæнынц, фæлладуадзæн зонæ саразынмæ, уымæй. Уыцы программæйы фæлгæты ма нысан кæнынц Æрыдоны фистæгæйцæуджыты фæндаг саразын дæр. Мичуриныхъæуы цæрæг Хуырымты Эдуард арфæ ракодта республикæйы разамындæн, иувæрсты цæуæг нырыккон фæндаджы арæзтады тыххæй. Фæлæ куыд фæбæрæг кодта, афтæмæй транспорт бирæ кæй ис, уый аххосæй сæйраг фæндаг заууатмæ æрцыди.
