Ныхас цыди национ проекттæ æмæ паддзахадон программæты фæлгæты цы мадзæлттæ нысангод æрцыди, уыдон царды куыд æххæстгонд цæуынц, ууыл
Республикæйы Хицауады сæрдар Дзанайты Барисæн кусæг фембæлд уыди хицауады уæнгтимæ æмæ муниципалитетты сæргълæуджытимæ. Ныхас цыди национ проекттæ æмæ паддзахадон программæты фæлгæты цы мадзæлттæ нысангод æрцыди, уыдон царды куыд æххæстгонд цæуынц, ууыл. Дзанайты Барис министрадты разамонджытæн бахæс кодта, 2024-æм 2026-æм азтæн бюджетон курдиæттæн хъæугæ информаци бацæттæ кæнын. Премьер министр бафарста, Комсомольскæйы æмæ Кæрдзыны дондзæуæн хæтæлты рацарæзты проекттыл куыст куыд цæуы, уый тыххæй, стæй Бæтæхъойы хъæуы сывæллæтты рæвдауæндоны арæзтад цы къæпхæныл ис, уымæй. Ацы мадзæлттæн республикæ райста уæлæмхасæн фæрæзтæ. Куыстытæ дзы цæуынц нысангонд фæткмæ гæсгæ. Бæтæхъойы хъæуы хæстæгдæр бонты райдайдзысты донæй ифтонг кæныны системæйы бындурон рацарæзтыл кусын. Алагиры районы 420 абоненты бафтыдтой ног доныхызтæм. Хæтæлтæ дзы сæвæрдтой доны системæйы рацарæзты программæйы фæрцы. Ныридæгæн уал сæвæрдтой хæтæлы 15 километры. Ныхас цыди æнæниздзинадхъахъхъæныны фарстатыл дæр. Профилон министр Тебиаты Сослан куыд загъта, афтæмæй Æрыдоны районы рынчындоны сцæттæ ис мрт-йы аппарат кæм сæвæрдзысты, ахæм агъуыст. Дзæуджыхъæуы 4-æм поликлиникæйы кæронмæ фæхæццæ кæны фæрсагъуысты арæзтад. Уым дæр сæвæрдзысты компьютерон тамогрæф. Уымæй дарддæр, Мæздæджы районы æвæрынц тагъд кæй аразынц, ахæм фелдьдшерон-акушерон пункттæ. Сæ саразынæн фæрæзтæ радих кодтой Уæрæсейы Хицауады резервон фондæй.
