Ныхас цыд 2024-2025-æм азты бюджетыл
Хицауады сæрдар Дзанайты Барисы разамындæй арæзт æрцыд бюджеты æмæ финансон фарстаты къамисы æмбырд. Ныхас цыд 2024-2025-æм азты бюджетыл. Бæстон доклад скодта Цæгат Ирыстоны финансты министры хæстæ рæстæгмæ æххæстгæнæг Исахъты Олег. Куыд загъта, афтæмæй документмæ бахастой ивддзинæдтæ. Баст сты, 2023-æм азы бюджеты æфтиæгты хай 8 миллиарды æмæ 800 милуан сомы, хæрдзтæ та 7 миллиарды æмæ 400 милуан сомы фæфылдæр кæнынимæ. Фæрæзтæ схардз кæндзысты социалон фарстатыл. Се хсæн – куысты мызд æмæ социалон фиддонтæ. Бюджет фæфылдæр кæныны тыххæй пайда кæндзысты резервон гæнæнтæй. Документмæ æркæсынмæ æрвыст æрцæудзæн республикæйы Парламентмæ. Бæстон æм æркæсдзысты дыккаг бакасты. Ацы азы хатдзæгтæм гæсгæ, арæзт æмæ рацарæзт цæуынц 170 объекты онг. Бирæтæ сæ радтой эксплуатацийы – рæвдауæндæттæ, скъолатæ, поликлиникæтæ æмæ амбулаторитæ, культурæйы хæдзæрттæ, спортивон æмæ фæлладуадзæн фæзтæ. Се ппæт объекттæ дæр ахсджиаг сты Цæгат Ирыстоны цæрджытæн. 2023-æм азы ма фæнд кæнынц 160 объектæй фылдæрыл бакусынмæ. Афтæмæй æххæст кæнынц регионы разамонæг Сергей Меняйлойы амынддзинæдтæ.
