Мадзалы архайджытæ хорзыл банымадтой Мæздæджы районы агрокомплекс саразыны стыр инвестпроект
Хицауады сæрдар Дзанайты Барисы разамындæй арæзт æрцыд инвестициты Советы æмбырд. Мадзалы архайджытæ хорзыл банымадтой Мæздæджы районы агрокомплекс саразыны стыр инвестпроект. Царды йæ уаддзæн компани «ЭКС». Проектмæ гæсгæ уыдзæн инновацион куыстуат бæрзондтехнологон кусæнгæрзтимæ. Уый фæрцы бантысдзæн хъæууонхæдзарадон хомаг регионы æлхæнын. Компанийы æххæстгæнæг директор Олег Яровойы ныхæстæм гæсгæ, инвестор цæттæ у комплекс аразынмæ иннæ аз бавналын, 2024-æм азы æххæстæй кусын райдайын. Проекты фæрцы фæзындзæн ног куысты бынæттæ, республикæйы бюджетмæ æрвылаз цæудзæн фиддонтæ хъалонты хуызы, рæздзæн хъæууон хæдзарады къабаз. Советы ма æркастысты иу инвестпроектмæ – стыр базарадон-ирхæфсæн комплексы арæзтадмæ. Уый царды уаддзысты Дзæуджыхъæуы. Сæрмагонд æргом дзы здæхт цæудзæн арæзтадон-цалцæггæнæн нысаниуæгимæ товартæ уæй кæнынмæ. Проекты тыххæй радзырдта компани «Перспективные технологии»-йы директор Хъараты Анзор. Инвестициты бæрц уыдзæн 1 миллиард 400 милуан сомы бæрц. Дзанайты Барис куыд загъта, афтæмæй ахсджиаг сты социалон æмæ экономикон нысаниуæг кæмæн ис, ахæм бизнес-проекттæ.
