Ныхас цыд республикæйы экономикæйы рæзтыл санкциты уавæрты
Хицауады сæрдар Дзанайты Барисы разамындæй арæзт æрцыд Оперативон штабы æмбырд. Ныхас цыд республикæйы экономикæйы рæзтыл санкциты уавæрты. Афтæ алы мæй дæр социалон æххуыс исынц цалдæр категорийы адæм. Зæгъæм, ацы азы райдианæй æртыккаг æмæ фылдæр сывæллæттæ кæм райгуырд, ахæм 8 мин бинонтæ райстой фиддонтæ. 3 азæй 7 азы онг кæуыл цæуы, ахæм сывæллонджын бинонтæ та сты 19 мины онг. Уый тыххæй радзырдта фæллойы æмæ социалон рæзты министр Айдарты Алинæ. Йæ хъуыдымæ гæсгæ стыр ахадындзинад ис социалон контракттæн. Сæ фæрцы фæкæсынхъуаг бинонтæ фæхуыздæр кодтой сæ уавæр, стæй ма æгуыст адæмы нымæц дæр фæкъаддæр. Рагагъоммæ бæрæггæнæнтæм гæсгæ, ацы аз социалон контракттæ бафыстой мин æмæ 500 адæймагæй фылдæр. Уымæй дарддæр республикæйы районты арæзт фæцæуынц бынæттон куыстуæтты продукцийы хъæууонхæдзарадон армукъатæ. Фыццаг ахæм мадзæлттæ ацыдысты Кировы æмæ Рахизфарсы районты. Санкциты рæстæг ахсджиаг у чысыл æмæ астæуккаг амалхъомдзинадæн æххуыс кæнын. Ацы фарстайыл бæстондæр æрлæууыд экономикон рæзты министр Кучиты Зауыр. Комплексон æххуыс исынц, хи хъуыддаг байгом кæнынмæ чи хъавы, ахæм адæм. Райдайгæ амалхъом адæмæн та экономикон рæзты министрад ратты гранттæ 300 мин сомы онг. Национ проект «Чысыл æмæ астæуккаг бизнесæн æххуыс» æххæст кæнгæйæ, гранттæ лæвæрд цæуынц субсидиты хуызы. Æппæт механизмтæй хъуамæ ахадгæйæ пайда кæной, цæмæй проекттæ царды уадзой, уый тыххæй, – загъта Дзанайты Барис.
