Ныхас дзы цыди, республикæйы цы инвестицион проекттæ ныффидар кæнынмæ хъавынц, уыдоны ахадындзинадыл
Дзанайты Барисы разамындæй арæзт æрцыди инвестициты фарстаты фæдыл æмбырд. Ныхас дзы цыди, республикæйы цы инвестицион проекттæ ныффидар кæнынмæ хъавынц, уыдоны ахадындзинадыл. Æмбырды презентаци скодтой цалдæр инвестпроектæн. Зæгъæм, ссадыссæн кроимæ бирæвæрсыг агропромышленнон комплекс. Уыдзæн дзы хъæууонхæдзарадон продукцийæ консервтæ кæныны цех æмæ скълæдты комплекс дæр. Бæрæггонд куыд у, афтæмæй проект сæххæст кæныныл инвесторты фæрæзтæй ныридæгæн хардзгонд æрцыди 300 милуан сомы. Фæнд ма кæнынц кредиттæ райсын дæр. Фыццаг къæпхæны уал куысты бынæттæ ратдзысты 150-йы бæрц. Æмбырды архайджытæ ма æрныхас кодтой агротуристон -дзæбæхгæнæн комплексы арæзтадыл дæр. Проекты фæлгæты ис фысымуæтты, коттеджты æмæ банкетон залты арæзтад. Ныридæгæн ын радих кодтой зæххы хай, æмæ йыл цæудзæн куыст. Дзанайты Барис загъта, инвестортæн аккаг уавæртæ скæнын фыццаградон хæс кæй у, уый. Нæ республикæйы цы проекттæ саразынмæ хъавынц, уыдоны фæрцы размæ зынгæ къахдзæф акæндзысты хицæн къабæзтæ, уыимæ та нæм фæзындзæн ног куысты бынæттæ, стæй бюджетмæ хъалонты æфтиæгтæ. Æмтгæй та фæхуыздæр уыдзæни регионы социалон-экономикон рæзт.
