Архайдтой дзы профилон министрады æмæ республикæйы медицинон организациты минæвæрттæ
РЦИ-А Хицауады сæрдар Дзанайты Барисы разамындæй ацыди æнæниздзинадхъахъхъæнынады фасртатимæ баст æмбырд. Архайдтой дзы профилон министрады æмæ республикæйы медицинон организациты минæвæрттæ. Æрдзырдтой дзы адæмы диспансеризацийыл, хостæй ифтонг кæныныл, æмæ финансон-хæдзарадон фарстатыл. Æнæниздзинадхъахъхъæнынады министр Тебиаты Сослан куыд загъта, афтæмæй ацы азы фыццаг æмбисы, 124 мин адæймаджы ацыдысты диспансеризаци. Ацы мадзæлтты активонæй архайынц цæугæ медицинон комплекстæ, æххуыс кæнынц республикæйы рынчындæттæ дæр, уыдон специалистты æрвитынц районтæм. Дзанайты Барис Тебиаты Сосланæн бæхаста фæндон, цæмæй министрады, поликлиникæты æмæ рынчындæтты разамынд сæхæдæг дæр архайой цæугæ бригадты хыгъды. Уæд адæм диспансеризацимæ се ргом райдаиккой фылдæр здахын. Медицинон бригадты цы специалисттæ ис, уыдоны хъæуы фæфылдæр кæнын, цæмæй иу адæймаг дæр æнæ бæлвырд æркастæй ма баззайа, уæлдайдæр та йе нæниздзинад цудыд кæмæн у, ахæмтæ. Уый у ахсджиаг, уымæн æмæ ахæм хуызы низ рабæрæг кæнæн ис йæ тæккæ райдианыл, æмæ уæд йе сдзæбæх кæнын у бирæ æнцондæр. Республикæйы льготæтæй чи пайда кæны, ахæм рынчынтæн ацы аз дихгонд æрцыди 880 милуан сомы, уыимæ, уæлæмхасæн та 97 милуаны, загъта профилон министр. Премьер бахæс кодта, льготæтæм гæсгæ хостæй ифтонг кæныны хъуыддагмæ бæстон цæст дарын. Уæлдайдæр та дæрддзæф хъæутæм хостæ куыд хæццæ кæнынц, уымæ. Æмбырды ныхас цыди æндæр хъуыддæгтыл дæр. Афтæ, Цæгат Ирыстоны арæзт цæуынц æнæниздзинадхъахъхъæнынады объекттæ, цалцæггонд цæуынц ныртæккæ дзы чи ис, уыдон, стæй сæ ифтонг кæнынц нырыккон кусæнгæрзтæй. Æппæт ацы мадзæлтты сæйраг нысан у, республикæйы цæрджыты æнæниздзинады æмвæзад уæлдæр кæнын, уымæй йæ ныхас баххæст кодта Дзанайты Барис.
