Ныхас цыд республикæйы социалон-экономикон рæзтыл
Премьер Дзанайты Барисы разамындæй уыд Хицауады æмбырд. Ныхас цыд республикæйы социалон-экономикон рæзтыл. Финансты министры хæстæ рæстæгмæ æххæстгæнæг Оксана Карова бацæттæ кодта дзуапдæттæн доклад, 2025-æм азы фыццаг æмбисы бюджет куыд æххæстгонд æрцыд, уый тыххæй. Регионалон бюджеты æфтиæгтæ систы 23 миллиард сомæй фылдæр, хæрдзтæ та 24 миллиарды, 900 милуан сомы. Хæрдзты фылдæр хай ис социалон-культурон къабазы. Уыцы нысантæн радих кодтой 18 миллиард сомы. Раздæрау, ахсджиаг у социалон фиддонты фарста. Фæстаг рæстæг стыр куыст цæуы социалон, коммуналон, æмæ фæндаггон инфраструктурæйы рæзтыл. Ацы аз объектты арæзтад æмæ рацарæзтæн фæрæзты бæрц сси 11 миллиард сомæй фылдæр. Ахсджиаг у æппæт мадзæлттæ дæр æххæст кæнын, – загъта Дзанайты Барис. Сфидар ма кодтой, республикæйы дæрддзæф территориты цы медицинон кусджытæ фæллой кæнынц, уыдонæн компенсацион фиддонты хыгъд. Ивддзинæдтæ хаст æрцыд, æрдзон цыртдзæвæнты тыххæй Хицауады уагæвæрды. Равхастой ма уынаффæ, Дзæуджыхъæуы исбонмæ ног иумæйагахуырадон скъола бадæттын. Арæзт æрцыд Хъæбæлоты Билары номыл уынджы, æмæ дзы ис 550 бынаты. Хъæуы йæ хæстæгдæр рæстæг эксплуатацийы раттын, – бахынцта премьер-министр. Уымæй дарддæр ныхас цыд æфсæддонты сывæллæттæн льготæтæ дæттыныл. Ивддзинæдтæ бахастой, фæндаггон инфраструктурæимæ баст хицауады уагæвæрдмæ. Ацы аз нысан кæнынц 5 миллиард сомы схардз кæнын фæндæгты арæзтадыл, бындурон цалцæгыл æмæ рацарæзтыл.
