Кæронбæттæн конкурсон фæлварæнты архайдзæн сентябры Бурятийы
Дзгойты Маринæ Цæгат Ирыстоны кад хъахъхъæндзæн Æппæтуæрæсеон конкурс «Мадæлон æвзаг æмæ литературæйы хуыздæр ахуыргæнæджы» номинаци «Мадæлон æвзаджы хуыздæр хъомылгæнæджы». Кæронбæттæн конкурсон фæлварæнты архайдзæн сентябры Бурятийы. Фæлтæрдджын педагогы тыххæй радзурдзæн Чехойты Фатимæ.
Рæвдауæндоны ис æцæг музей. Æмбæрзæнтæ нывæфтыдтимæ, æлыгæй конд дурынтæ, хохаг хæдзары мигæнæнтæ. Сæ фарсмæ та – хъомылгæнинæгты куыстытæ. Ам баиу сты ивгъуыд рæстæджы дзауматæ æмæ сабиты сфæлдыстад. Хъомылгæнæг Дзгойты Маринæ уд бауадзы Ирыстоны истори æмæ традициты. Афтæмæй, сабитæн уарзын кæны мадæлон æвзаг.
Сабитимæ кусгæйæ Маринæ пайда кæны дæсгай методикæтæй. Йæ авторон сты æнахуыр кубиктæ. Сæ фæрстыл – фысджыты хуызистытæ, адæмы цардæй цымыдисаг нывтæ. Алы къам дæр у къахдзæф ирон адæмы цард базонынмæ.
19 азы кусы Маринæ хъомылгæнæгæй. Йæхæдæг сывæллонæй ирон æвзагыл фыста æмдзæвгæтæ æмæ аргъæуттæ. Уыд литературон конкурсты уæлахиздзау. Сфæлдыстад сси сæйраг фæрæз хъомшылгæнæджы куысты.
Конкурсты архайын Маринæйæн ногдзинад нæу. Хъомылгæнæг Цæгат Ирыстоны кад хъахъхъæндзæн конкурс «Мадæлон æвзаг æмæ литературæйы хуыздæр ахуыргæнæджы» номинацийы «Мадæлон æвзаджы хуыздæр хъомылгæнæг». Йæ кæронбæттæн ацæудзæн Бурятийы. Маринæйы хъуыдымæ гæсгæ, педагог хъуамæ æдзух архайа йæ зонындзинæдтæ уæрæхдæр кæныныл. Йæ куысты æрмæст ног методикæтæ æмæ аргъæуттæй нæ пайда кæны, фæлæ мультипликацион кинщ онывтæй, кусы цæмæй сæ хъайтартæ дзурой ирон æвзагыл.
Мадæлон æвзаг хъахъхъæнгæйæ хъахъхъæнæм нæ уидæгтæ. Дзгойты Мæринæйæн хъомылгæнæг уæвын дæсныйад нæу, у йæ зæрдæйы фæндон. Цалынмæ мадæлон æвзаг хъуыса, уæдмæ цæрдзысты адæмы культурæ æмæ истори. Абон сабиты алы ныхас дæр у Ирыстоны фидæны хай.
