Чызгмæ ныридæгæн ис стыр æнтыстдзинæдтæ
Абон уын нæ программæйы радзурдзыстæм æвзонг, фæлæ курдиатджын зарæггæнæджы тыххæй. Джыгкайты Алинæйыл цæуы 10 азы, уыдонæй се мбис архайы музыкæйы. Чызгмæ ныридæгæн ис стыр æнтыстдзинæдтæ. Йæ хъæлæсæй аивæй фæзæлынц куыд классикон, афтæ нырыккон уацмыстæ. Чехойты Фатимæ радзурдзæн бæлвырддæр.
Джыгкайты Алинæ æдзухдæр хъуыды кæны йæ фидæныл. Алы бон дæр йæ размæ савæры сæрмагонд нысан. Вокал, скрипкæ, кафджыты къорд – йæхиуыл кусы, цæмæй йæ бæллиц сæххæст уа. Фæнды йæ оперон заррæггæнæг суæвын, цæмæй Мариинаг æмæ Стыр театрты сценæйæ зæлланг кæна йæ рæсугъд хъæлæс. Музыкæ йын бауарзын кодта йæ деду Цæгъаты Барис. Уый цагъта бабалайкæйыл. Алинæйы курдиат дæр уый раиртæста. Чызг йæхæдæг куыд зæгъы, уымæ гæсгæ æнæ музыкæйæ нал базонид цæрын.
Ирд стъалы. Алинæ сценæмæ фыццаг хатт рацыд 5 аздзыдæй. Уæдæй нырмæ иу æмæ дыууæ хатты не сси муниципалон, регионалон, æппæтуæрæсеон, æмæ ма суанг æппæтадæмон конкурсты æмæ фестивальты лауреат. Æдзухдæр йæ фарсмæ сты йæ ныййарджытæ. Алы концерты дæр йæ мад æмæ йæ фыд фæбадынц æппæты разæй.
Алинæйæн йæ музыкалон æвæрæн у алывæрсыг. Ис ын дзы эстрадон, адæмон æмæ академион уацмыстæ. Чызгæн ис дыууæ ахуыргæнæнджы. Уыдон ын архайынц йæ вокалон дæсныйад фылдæр кæныныл. Кусынц, цæмæй æрыгон зарæггæнæджы арæхстдзинад бонæй бон уæрæхдæр кæна. Æмæ сын уый тыххæй Алинæ стыр аргъ кæны.
Михаил Глинкæйы «Жаворонок» -æй райдай æмæ суанг Франц Шуберты «Аве Мария»-йы онг. Дисы æфтауы Алинæйы репертуар. Йæ ахуыргæнæг Нартыхъты Ланæ йæ зæрдæ дары, æрыгон заррæггæнæгæн йæ бæллиц кæй сæххæст уыдзæн, ууыл. Æрдзæй лæвæрд курдиат, тырнындзинад æмæ куыстуарзондзинад сты Алинæйæн йæ музыкалон æнтыстдзинадæнты бындур.
Ахуыры аз фæци. Æртæ сæрдыгон мæйы – Алинæйæн йæ фæлладуадзæн рæстæг. Фæззæджы та фидæны оперон зарæггæнæг ног тыхтимæ кусдзæн йæ бæллиц æххæст кæныныл. Уæндон къахдзæфтæ кæндзæн музыкæйы бæрзæндтæм.
