Мадзал баст уыд йæ райгуырды 150 азы бонимæ
Джызæлы музыкалон скъолайы кадджын уавæры байгом кодтой Коцойты Арсены мемориалон фæйнæг. Мадзал баст уыд йæ райгуырды 150 азы бонимæ. Хуынд æм æрцыдысты бынæттон цæрджытæ, республикæйы фысджыты Цæдисы уæнгтæ стæй Коцойты мыггаджы минæвæрттæ. Зындгонд ирон æмæ советон фыссæг, прозаик йæ фыццаг къахдзæфтæ ахуырады кодта ацы ран. Райгуырд мæгуыр зæхкусæг бинонты. 9 азы йыл куы сæххæст, уæд бацыд Джызæлы скъоламæ. Уый фæстæ та ахуыр кодта Æрыдоны семинарийы. Уым бауарзта литературæ. Ахуырмæ тырнындзинад ахæм тыхджын уыди, æмæ ма суанг иу хатт йе мбалимæ Æрыдонæй Дзæуджыхъæумæ ссыдысты фистæгæй, цæмæй сæхи цæстæй феной Хетæгкаты Къостайы. Фæстæдæр Коцойты Арсены радзырдтæ мыхуыргонд цыдысты газетты «Терские ведомости» æмæ «Казбек». Уымæй дарддæр ма Арсен куыста ахуыргæнæгæй. Тифлисы мыхуыры уагъта æрвылкуъырион журнал «Æфсир». Рауагъдад стыр æвæрæн бахаста ирон литературæйы æмæ публицистикæйы рæзтмæ. Уый фæстæ куыста большевистон газет «Правда»-йы. Уым ныммыхуыр кодтой йæ радзырдтæ «Помечтали», «Охотники» æмæ «Товарищ». Фæстæдæр та Коцойты Арсен куыста газет «Петербургские ведомости». 1917-æм азы Октябры революцийы фæстæ архайдта ирыстойнаг мыхуыры фæрæзтæ райрæзын кæныныл. Царди Цхинвалы æмæ уыд хуссарирыстойнаг газет «Хурзæрин» æмæ журнал «Фидиуæджы». Коцойты Арсены номарæн боны официалон хайы фæстæ скъолайы арæзт æрцыд зæрдæмæдзæугæ концерт.
