Лæгдзинады æмæ хъæбатырдзинады тыххæй хорзæхджынгонд æрцыдысты сæ амæлæты фæстæ
Зæрдыл дарыны æмæ хъуыды кæныны акци. Цæгат Ирыстоны скъолаты ныридæгæн байгом кодтой 100 сæрмагонд къласæй фылдæр. Уыдон хæссынц Советон Цæдисы æмæ Уæрæсейы Хъæбатырты нæмттæ. Афтæмæй скъолаты æххæст кæнынц граждайнаг-патриотон традицитæ. Уыимæ ахæм куыст цæуы сæрмагонд ахуырты æмæ фæсурокты дæр. Афтæмæй хъæбатырты нæмттæ, сæ лæгдзинад, кад æмæ намысы дæнцæгтæ никуы фæмынæг уыдзысты. Патриотон акци ахæццæ кодтой Джызæлы, æмæ бæлвырддæр хабæрттæ радзурдзæн Фидараты Маринæ.
Джызæлы санаторон скъола-интернат хæссы инæлар-майор, блокадæйы Ленинград хъахъхъæнæг, бирæ хæстон хæрзиуджыты кавалер Бæройты Михалы ном. Амæй фæстæмæ скъолайы 4 къласы хæсдзысты хъæбатрыты нæмттæ. Уыдон та сты Советон Цæдисы æмæ Уæрæсейы хъайтартæ: Михаил Малофеев, Мзокты Тимур, Ладо Давыдов æмæ Андрей Стрельников. Лæгдзинады æмæ хъæбатырдзинады тыххæй хорзæхджынгонд æрцыдысты сæ амæлæты фæстæ. Ныр сæ рухс нæмттæ канд æфсæддон хроникæйы нæ баззайдзысты.
Проект саразæг æмæ координатор у – Фыдыбæстæ æдзард хъахъхъæнджыты æппæтуæрæсеон æхсæнадон организацийы цæгатирыстойнаг хайад. Нæ респбуликæйы ныры онг байгом кодтой 100 къласæй фылдæр. Æмæ уый у скъоладзауты патриотон хъомылады нырыккон историйы ахадгæ хай.
Хуыздæр ахуырдзауæн – хъæбатыры номимæ вымпел, къласæн та сæрмагонд стенд. Уым фыст ис хъæбатыры лæгдзинады тыххæй хъусынгæнинаг. Стæй ма иннæ æхсызгон лæвар – æфсæддон публицистикæйы уникалон æмбырдгонд. Бæлвырд дзы фыст ис мидхъуыддæгты министрады мидæфсæдты 49-æм хицæн бригады тыххæй æрмæг, стæй æвзонг патриотæн хъæугæ зонындзинæдтæ.
Хъæбатыры номыл партæ байгом кæныны акцийæ æххæст кæнынц скъолайы граждайнаг-патриотон традицитæ. Ам истори хъахъхъæнынц цæстыгагуыйау. Уыимæ ахæм куыст цæуы сæрмагонд ахуырты æмæ фæсурокты дæр.
Уникалон экспонаттæ, атрибутикæ, стæм чи у, ахæм мыхуыры фæрæзтæ æмæ ирд стендтæ бацæттæ кодтой Уæрæсейы хъахъхъæнынады Министрады 58-æм æфсад æмæ «Салдæтты мадæлты Комитеты» регионалон хайад. Аргъ кæмæн нæй, ахæм æрмæг бындур сæвæрдта, патриотон хъомылады музей саразыны хъæппæрисæн.
Галерея æрбынат кæндзæн библиотекæты фонды, æмæ афтæмæй, зæгъынц, хъахъхъæндзысты уæрæсейаг салдæтты хъæбатырдзинады истори. Конкурстæ, къласы сахаттæ, лæгдзинады уроктæ хъуамæ хорзырдæм фæбæрæг уой скъоладзауты патриотон хъомыладыл.
Дзебысаты Лолитæйыл цæуы 11 азы. Фыццаг бакастæй йе мгæрттæй ницæмæй хицæн кæны. Йе мкъласонты хуызæн у хæларзæрдæ, зонындзнæдтæм тырнæг чызг. Фæлæ ма ис иу фиппаинаг. 6-æм къласы ахуырдзау кæны иртасæн куыст. Схуыдта йæ – «Учителей святые имена». Æрыгон чызг бæлвырд иртасы Фыдыбæстæйы Стыр хæсты истори, æмæ æмбырд кæны цымыдисаг æрмæг.
Хъæбатырты нæмттæ никуы мынæг кæнынц. Сæ лæгдзинад, кад æмæ намысы дæнцæгтæ дæр афтæ. Уымæ гæсгæ ацы скъолайы ахуырдзаутæ ныр бæлвырд зонынц – дзырдбаст «Лæггад кæнын Фыдыбæстæйæн!» хуымæтæг ныхæстæ не сты, фæлæ æцæг хъæбатырты царды мидис.
