Ног дзы кæнынц инфраструктурæ, коммуникацитæ
Джызæлы скъола-интернаты æнтыстджынæй æххæстгонд цæуы бындурон цалцæг. Ног дзы кæнынц инфраструктурæ, коммуникацитæ. Специалисттæ базылдысты ахуырадон кабинеттæм дæр. Ныртæккæ скъолайы ахуыр кæны 240 сывæллоны. Цалцæджы рæстæгмæ сæ раивтой Джызæлы фыццæгæм скъоламæ. Бæлвырддæр радзурдзæн Хъайтмазты Дзерассæ.
Ахæм æрвылкъуырион æркаст объекты – хуымæтæг хъуыддаг у. Цалцæггæнæн куыстыты алы къæпхæнмæ дæр цæст дарынц скъола-интернаты педагогтæ. Нысангонд цæуы алы ног элемент дæр. Ахуыргæнджытæ куыд зæгъынц, афтæмæй специалисттæ иттæг хорз кусынц. 60 азмæ скъолайы бындурон цалцæг иу хатт дæр нæ уыд.
Цæгат Кавказы санаторон хуызы иунæг ахуыргæнæндон ног кæнынц нацпроект «Фæсивæд æмæ сывæллæттæ» æххæстгæнгæйæ. Джызæлы скъола-интернаты ис 370 бынаты, фæлæ дзы ахуыр кæны 240 сывæллоны. Сæ иу хай ам исынц æрмæст зонындзинæдтæ нæ, фæлæ медицинон æххуыс дæр. Дзæбæхгæнæн мадзæлттæн ис æнæхъæн блок. Æппæт цалцæггæнæн куыстытæ æххæстгонд куы æрцæуой, уæд бавналдзысты хъæугæ кусæнгæрзтæ æвæрынмæ.
Бындурон цалцæг ам райдыдта фарон апрелы. Ныридæгæн сног кодтой коммуникацитæ, базылдысты кабинеттæм, баивтой пъолтæ, рудзгуытæ, дуæрттæ. Сцалцæг кодтой хуыссæн корпус, хæрæндон, цæлгæнæн. Пъланмæ гæсгæ цы нысангонд уыд, уымæй фæстæмæ ма специалисттæ æххæст кæнынц уæлæмхасæн куыстытæ дæр.
Сметæйы цы куыстытæ нысангонд сты, уыдонæн сæххæст кодтой сæ 95 проценты. Баззадис ма, фæрæзтæ цæмæн не сфаг, уый. Фæлæ ам дæр специалисттæ цæттæ сты баххуыс кæнын бæлвырд уавæрты. Ныртæккæ аивгонд цæуынц, куыстытæ цы агъуыстыты фесты, уыдон. Ахуыргæнджытæ æнхъæлмæ кæсынц, скъолайы ноггонд бæстыхайы ног ахуыры аз сæ ахуырдзаутимæ куыд сæмбæлдзысты, уымæ.
