Æмгуыстады фарстатыл дзырдтой Сергей Меняйло æмæ компанийы райрæзты директор Максим Вахтин
Егъау базарадон хыз «Лентæ» Дзæджыхъæуы байгом кæндзæн гипермаркет. Æмгуыстады фарстатыл дзырдтой Сергей Меняйло æмæ компанийы райрæзты директор Максим Вахтин. Уазæг куыд бафиппайдта, афтæмæй «Лентæ»-йæн нæ бæстæйы алы регионты ис 250 дуканийы бæрц æмæ компанийы рагæй фæндыдис нæ республикæимæ базарадон æмгуыстад саразын. Сергей Меняйлойы ныхæстæм гæсгæ, уыцы хъæппæрис нымайы хорзыл, фæлæ фыццаджыдæр хъуамæ ног гипермаркет сараза хорз авналæнтæ бынæттон амалхъомадæн. Компанийы минæвæрттæ куыд бахахх кодтой, афтæмæй гипермаркеты парахатæй равæрдзысты бынæттон товараразджыты продукци. Проект куыд æххæстгонд цæудзæнис, уый тыххæй информаци компани рахæдзæнис инвестициты советы размæ, уый фæстæ та республикæ æмæ «Лентæ» бафысдзысты æмгуыстады бадзырд.
