Уыдонимæ та сæм фæзындысты нырыккон кусæнгæрзтæ
Елхоты æмæ Æрыдоны колледжты байгом кодтой ног æрмадзтæ. Уыдонимæ та сæм фæзындысты нырыккон кусæнгæрзтæ. Ахæм уавæрты студенттæн уыдзæн зынгæ æнцондæр сæ фидæны дæсныйады сусæгдзинæдтæ базонын. Сæ практикон ахуыртæ куыд цæуынц, уый тыххæй бæстондæр радзурдзæн Фидараты Маринæ.
Дзулфыцæн, адджын гуылтæ æмæ хæринаггæнæджы дæсныйад. Уымæй дарддæр машинæ цалцæггæнæн æрмадз. Æдæппæтæй 8 æрмадзы – алыхуызон компетенцитæм гæсгæ. Алкæцы дæр дзы суыдзæн WorldSkills-ы регионалон чемпионатæн фæз. Гæбæраты Симæ ныр бирæ азты кусы Елхоты бирæвæрсыг колледжы. Куыд зæгъы, афтæмæй æрмадзтæ æмæ лабораторитæ рагæй уыдысты цалцæггæнинаг. Ныр та ног кусæнгæрзтимæ æмæ ног фæзты фæсивæд кусæг дæсныйæдтæ æнцондæрæй æмæ цымыдисдæрæй исдзысты.
Федералон бюджетæй иумæйаг субсидиты бæрц сси 44 милуан сомы. Паддзахадон æххуысы фæрцы студенттæн фадат ис нырыккон дæсныйæдтæ базонынæн дæр.
Фарон колледж самал кодта ног трактортæ æмæ камазтæ. Ныртæккæ та æрмадзтæ фæхъæздыгдæр сты 4 рог машинæ «Лада Гранта»-йæ. Студенттæн та райдыдтой практикон ахуыртæ.
Æрмадзты нысан кæнынц канд студентты ахуыр кæнын нæ, фæлæ ма ахуыргæнджыты æмæ мастерты фæлтæрддзинад фылдæр кæнын дæр. Уымæй дарддæр сæм хондзысты скъоладзауты. Ацы хатт уал уыдысты уазæгуаты.
Нысантæм гæсгæ ма арæзт æрцæудзысты демонстрацион фæлварæны æмæ компетенциты сæрмагонд центртæ дæр. Ног æрмадзтæ фадат ратдзысты ерыстæм цæттæ кæнынæн. Педагогты хъуыдымæ гæсгæ, ифтонггонд фæзтæ цæттæ кæндзысты фæлтæрдджын кадрты.
Национ проект «Ахуырад»-ы фæрцы ма иу грант рамбылдта Æрыдоны аграрон-технологон колледж. Ам дæр сног кодтой 8 æрмадзы.
