Хъæуы цæрджытæ куыд зæгъынц, афтæмæй куыйты хæцæнгарзæй фехстой æнæзонгæ адæм
Æвирхъау хъуыддаг… Елхоты бырæтты быдыры ссардтой мард куыйты. Се хсæн – хæдзарон цæрæгойтæ дæр. Хъæуы цæрджытæ куыд зæгъынц, афтæмæй куыйты хæцæнгарзæй фехстой æнæзонгæ адæм. Зæгъын хъæуы уый дæр, æмæ цау æрцыд Елхоты сæйраг уынджы, сывæллæтты цæстыты раз. Цы зæгъынц хъæуы цæрджытæ ацы хъуыддаджы тыххæй, уый базондзыстæм, Тъехты Элинæ цы сюжет бацæттæ кодта, уымæй.
Ацы кадртæ ист сты Елхоты. Ис дзы хæцæнгарзæй æхст куыйтæ. Сæ хъуырбæттæнтæм гæсгæ ис скæнæн хатдзæг, æнæхæдзар кæй уыдысты, уый. Се хсæн ис къæбылатæ дæр. Хъæуы цæрджытæ цæстысыгимæ дзурынц ацы хабары тыххæй. Бонæй, сывæллæтты цæстытыл фыдгæнджытæ æнæномыр машинæйыл рацыдысты сæйраг уынгмæ æмæ агæрах кодтой æххуысхъуаг цæрæгойты.
Чеджемты Жаннæ: «Ацы хабар базыдтон цалдæр боны размæ. Уыд мын тынг зын. Куыйтæ дæр, фос дæр сфæлдыста Хуыцау уый тыххæй нæ, цæмæй сæ адæм марой».
Куыдз Джумбæ дæр амард фыдгæнджыты нæмгуытæй. Æлбегаты Илитæ куыд зæгъы, афтæмæй уыд сыхы сывæллæтты уарзондæр цæрæгой. Сæ цыппаркъахыг æмбал фесæфт къуыри размæ. Фæстæдæр æй тугæйдзагæй ссардтой, фæлæ йæ сæ бон аирвæзын кæнын нал сси.
Æлбегаты Илитæ: «Сывæллæттæ куыдзы тынг уарзтой. Куы фæрынчын, уæд æм зылдысты.
Цæрæгойты фхæрджыты нæ баурæдтой нæ адæмы курдиæттæ, нæ куыйты ниуд. Ахæм æбуалгъ хъуыддаг чи бакодтаид, уый Елхоты цæрджытæ нæ зонынц. Ист кадртæ бахаудтой социалон хызтæм дæр. Уымæй уæлдай ма адæм курдиат бахастой хъæугæ инстанцимæ. Ацы цауы руаджы ма рабæрæг ног фарста. Мард цæрæгойты аластой, Елхоты бацæуæны цы быдыр ис, уырдæм. Быдыр дзаг у бырæттæй. Кировы районы администрацийы сæргълæууæг Батиаты Хъазыбеджы ныхæстæм гæсгæ, быдырмæ бырæттæ ласынц цалдæр азы. Цæмæй йæ рекультиваци скæной, уый тыххæй бюджеты фæрæзтæ нæй. Уæдæ æнæхæдзар цæрæгойтæн питомник скæнынмæ дæр фæрæзтæ нæй.
Батиаты Хъазыбег, Кировы районы администрацийы сæргълæууæг: «Ныридæгæн ацы фаста ис алы районы дæр. Цæрæгойты марæн нæй. Хъæуы сæ ахсын æмæ питомникты бакæнын. Цы цау æрцыд, ууыл архайдзысты мидхъуыддæгты министрады кусджытæ».
Цæрæгойты фхæрдмæ йæ цæст дары федералон закъон. Юристты ныхæстæм гæсгæ, фыдгæнджыты ссарын алкæд нæ рауайы.
Ацы истори сæнкъуысын кодта канд Елхоты цæрджыты нæ, фæлæ ма кадртæ чи фæдта, уыдоны дæр. Адæм сæ зæрдæ дарынц, аххосджынты кæй бафхæрдзысты ууыл, цæмæй ахæм цаутæ мауал æрцæуа, уый тыххæй.
