Йæ дуæрттæ байгом кæндзæн уалдзæджы
Музыкалон æмæ аивадон скъола, нырыккон æрмадзтæ æмæ иугондтæ, райдзаст чиныгдон, æмæ æрмæст уыдон нæ. Иууылдæр сæ иу ран баиу кæндзæн, Елхоты цы культурон центр арæзт цæуы, уый. Куыстытæ кæронмæ фæхæццæ кæнынц. Ног культурон центр йæ дуæрттæ байгом кæндзæн уалдзæджы. Арæзтад цæуы «Хъæуккаг территориты комплексон рæзты» паддзахадон программæмæ гæсгæ. Бæстондæр радзурдзæн Чехойты Фатимæ.
Куыстытæ бацыдысты сæ тæмæны. Елхоты культурон рæзты Центры арæзтад фæхæццæ кæны кæронмæ. Амад сты бæстыхайы дыууæ уæладзыджы, бамбæрзтой йын йæ сæр, баиу кодтой инженерон коммуникацитæ. Ныртæккæ цæуынц мидæггаг куыстытæ. Æрвылбон дзы архайынц 50 специалисты æмæ техникæйы цалдæр иуæджы. Уыцы иу рæстæг аразджытæ архайынц алфамблай территори аив кæныныл: цæттæ кæнынц быннаг цъар фистæгæйцæуджыты къахвæндæгтæн æмæ фæлладуадзæн фæзтæн, кæнынц цъæхфæлысты куыстытæ.
Фидæны ног Центр, 2 мин æмæ *рдæгæй фылдæр квадратон метры чи ахсы, уый суыдзæн хъæуы культурон артдзæст. Иу цары бын баиу уыдзысты музыкалон æмæ аивадон скъолатæ, нырыккон æрмадзтæ, сфæлдыстадон иугондтæ сывæллæттæн æмæ хистæртæн, райдзаст чиныгдон, стæй чысыл æрдзуарзджыты станцæ. Ныртæккæ дæр хъæуы ис культурæйы куыстуæттæ, фæлæ сты алы рæтты. Центр суыдзæн, ахуырад æмæ сфæлдыстады гæнæнтæ чи фæуæрæхдæр кæна, ахæм иугæнæг тыгъдад.
Уæлдай цæстдард цæуы нырыккон сценикон фæзы арæзтадмæ. Центры фæзындзæн стыр сценæ, æмæ 400 бынаты кæм уыдзæн, ахæм зал. Араздзысты дзы концерттæ, театралон постановкæтæ, фестивальтæ æмæ сфæлдыстадон коллективтимæ фембæлдтытæ. Ног культурон центр йæхимæ лвасдзæн елхотæгты. Цæрджытæ уым уаддзысты сæ фæллад, æвдисдзысты сæ курдиат, æмхиц кæндзысты культурон цардмæ. Арæзтад цæуы «Хъæуккаг территориты комплексон рæзты» паддзахадон программæмæ гæсгæ. Центр йæ дуæрттæ байгом кæндзæн ацы аз, уалдзæджы.
