Бæстыхайæн баивтой йæ сæр, скодтой дзы инженерон коммуникацитæ, фæлæ куыстыты ссардтой аипдзинæдтæ
Елхоты поликлиникæйы цалцæггæнæн куыстытæн аргъ скодтой Адæмон фронты минæвæрттæ. Бæстыхай бындурон цалцæг кæнын райдыдтой фарон. Æнхъæлмæ йæм кастысты 40 азы. Бæстыхайæн баивтой йæ сæр, скодтой дзы инженерон коммуникацитæ, фæлæ куыстыты ссардтой аипдзинæдтæ. Бæлвырддæр радзурдзæн Тъехты Элинæ.
Хъуына æмæ скъуыд къултæм кæсгæйæ адæймаджы уырнгæ дæр нæ кæны, бæстыхайы бындурон цалцæг скодтой æмæ йæ тагъд гом кæй кæндзысты, уый. Елхоты поликлиникæ цалцæггæнæн куыстытæм æнхъæлмæ каст 40 азы. Куыстыты хæрзхъæддзинадмæ æркастытсты Адæмон фронты минæвæрттæ. Инспекцийы хатдзæгтæй разы не сты.
Уæдæ бæстыхайы сæр дæр раст конд не рцыд. Техникон домæнтæн дзуапп нæ дæтты. Бæрнон кусджытæ йæм æрхастой фиппаинæгтæ.
Бæстыхайы баивтой инженерон коммуникацитæ, вентиляци, стæй дзы скодтой дзурæн системæ. Æнæ цалцæгæй ма баззадысты, поликлиникæ æмæ рынчындон цы бынат бæтты, уый, стæй цалдæр кабинеты. Уыдонимæ дæндæгты дохтыры кабинет дæр. Рентген – кабинеты къултæ æмæ пъол хъуамæ уой сæрмагонд æрмæгæй æмбæрзт, цæмæй рентгены тынтæй иртæст адæмæн зиан ма хæсса, уый тыххæй. Фæлæ дзы уый бæсты ис доны фæдтæ. Уæдæ поликлиникæйы кæрты цы асфальт сæвæрдтой, уый дæр сæттын райдыдта.
Фарста балæвæрдтой республикæйы бындурон цалцæджы управленимæ. Специалистты ныхæстæм гæсгæ, цæмæй подрядчиктæ сæ рæдыд сраст кæной, уый тыххæй сын нырма рæстæг ис.
Адæмон фронты минæвæрттæ куыд зæгъынц, афтæмæй профилон ведомствæйы дзуапп ратдзысты, поликлиникæйы цалцæггæнæн куыстытæм йæ цæст хъуамæ чи дара, уый.
