Дохтырты æмæ пациентты тыхсын кæны иу хъуыддаг, ома йæ сæхгæндзысты, æви нæ?
Эндокринологон диспансеры куысты фæдыл ныхæстæ фæстаг рæстæг сарæх сты. Дохтырты æмæ пациентты тыхсын кæны иу хъуыддаг, ома йæ сæхгæндзысты, æви нæ? Уыцы-иу рæстæг та Парламенты депутаттæм бацыд курдиат, медицинон куыстуат бахъахъхъæныны тыххæй. Ныртæккæйы онг рынчындоны хыгъды ис 58 мин адæймаджы. Уыдонæй 22 минмæ ис диагноз – сæкæрниз. Æмæ ма ныр сæхи низæй уæлдай тæрсынц, се нæниздзинад кæм хуыздæр кæнынц, уый сын æцæгæйдæр куы сæхгæной, уымæй. Уавæр раиртасыныл бацархайдта Гуытъиаты Алинæ.
Тогойты Земфирæмæ рабæрæг кодтой сæкæрниз. Сылгоймаг куыд зæгъы, афтæмæй уыцы низ уыдис йæ ныййарджытæм дæр. Рынчын кæй у, уый тыххæй нырма æрæджы базыдта, фæлæ иу хаттæн йæхиуыл фæгуырысхо. Зæгъæм, æдзухдæр кодта дойны, стæй цалдæр мæймæ йæ цæстæй æвзæр уынын байдыдта. Сæкæрниз æм кæй ис, уый базыдта эндокринологон диспансеры. Кæд батыхст, уæддæр ын дохтыртæ ныфсытæ бавæрдтой — низ афойнадыл кæй сбæрæг кодта, уый фæрцы йын тæссаг фæстиуджытæм нæ расайдзæн. Суанг ма йæ инсулины уколтæ кæнын дæр нæ бахъæудзæн.
Гаянэ Абиян дæр ацы диспансеры йæхи дзæбæх кæны. Сылгоймаджы уавæр уыдис ноджы уæззаудæр, уымæн æмæ фæрынчын коронавирусæй. Низ æй тынг бахъыгдæрдта. Цалдæр мæйы уыдис реанимацийы, иуцасдæр та йæхимæ не рцыд. Ковид фæсте баззад, фæлæ сылгоймаджы тухæнтæ нæма фесты. Цæмæй йæхиуыл фæхæца, уый тыххæй реабилитаци ацыд эндокринологон диспансеры. Йæ уавæр зынгæ фæхуыздæр.
Кардиолог, невропатолог, цæстыты дохтыр, дзæбæхгæнæн физкультурæйы кабинет, сæры тугдадзинты узи æмæ æндæр процедурæтæ. Сæкæрниз кæмæ ис, уыдонæн æмбæлынц алыхуызон дзæбæхгæнæн фæрæзтæ. Æрмæстдæр афойнадыл мадзæлттæ сæрмагонд иртæстытыл æнцой кæнгæйæ дæттынц хорз бæрæггæнæнтæ. Уыдонимæ ма коронавирусæй прививкæ скæн æмæ уæд æппындæр мацæмæйуал тæрс. Дохтыртæ куыд зæгъынц, афтæмæй прививкæ æппæты фыццаг æмбæлы, диабет кæмæ ис, уыцы адæмæн. Вакцинаци ис ацæуæн диспансеры дæр.
Сæкæрниз фæзыны æндæр аххосæгтæй дæр, сæйрагдæр та раст æмæ пайда хойраг куы нæ хæрай, уæд. Хъыгагæн диабетæй рынчын адæмы бæрц фæстаг рæстæг фылдæрæй фылдæр кæны. Уый тыххæй бæлвырд у, республикæйы эндокринологон диспансер æнæмæнгæй кæй хъæуы, уый. Йæ ахадындзинад ын уæлдайдæр бамбæрстой, регионы пандемия йæ тæмæны куы уыдис, уæд. Уыцы рæстæг рынчынты æмæ дохтырты аивтой æндæр бæстыхаймæ, диспансеры та æрæвæрдтой коронавирусæй рынчынты. Зæгъæн ис, уæззау замантæ фæсте баззадысты, фæлæ ныр та тыхсынц, диспансер кæй сæхгæндзыты, уымæй. Нырма уал бæрæг кæнынц, уыцы хъусынгæнинаг мæнг у æви раст, уый. Республикæйы парламенты та зæрдæ æвæрынц, хъуыддаг кæй равзардзысты, уымæй. Закъонмæ гæсгæ, ахæм егъау курдиаттæ æнæркæсгæйæ ныууадзæн нæй.
Парламенты радон æмбырд уыдзæнис цыппæрæмы. Æрбахондзысты йæм профилон министры. Республикæйы эндокринологон диспансер бахгæнынмæ кæй хъавынц, уый тыххæй хъусынгæнинаг у мæнг, медицинон куыстуæттæ та кусынц эпидемиологон уавæр нымайгæйæ – зæгъынц æнæниздзинадхъахъхъæнынады министрады.
