Артаджы, энергетикæйы æмæ цæрæн-коммуналон хæдзарады министрады кусджытæ цалцæг кæнынц паддзахадон объектты хъармгæнæн системæ, ивынц рудзгуытæ æмæ бæстыхæйтты сæртæ,
Дзæуджыхъæуы 4-æм гимназы директор Бутаты Вадим куыд зæгъы, афтæмæй сæ ахуыргæнæндоны хорзырдæм æрцыд бирæ ивддзинæдтæ. Энергии фæстауæрцгæнæн федералон программæйы фæрæзты руаджы сын баивтой сæ рудзгуытæ. Бындурон цалцæггонд æрцыд хъармгæнæн системæ дæр. Кæд æмæ раздæр уыд иумæйаг, уæд ныр скъолайы алы хайы дæр, бахъуаджы сахат ис ахуысын кæнæн системæйы кæцыдæр хай, зæгъæм, цалцæггæнæн куыстытæ кæнынæн. Æппæт мадзæлтæ дæр арæзт цæуынц энерги фæстауæрц кæнынæн. Программæйы объектты хыгъдмæ бахауд культурæйы колледжы бæстыхай дæр. Йæ сæр ын баивтой, хъарм æддæмæ чи нæ уадзы, ахæм æрмæгæй.
Цехъойты Ларисæ, РЦИ-Аланийы культурæйы колледжы директор: «Нæ бæстыхайы сæр æппындæр нал бæззыдис æмæ федералон програмæмæ куы бахаудтам, уæд культурæйы колледж дæр ацы хатт федтой æмæ нын æй скодтой, стыр бузныг сын, тынг дзæбх адæм куыстой ам. Сентябры æмæ октябры куыстой æмæ сæ тынг разы стæм».
Федералон программæ æхæстгæнгæйæ ма ивд цæуынц уынгты рухсытæ дæр. Зæгъæм, Æрыдоны сæйраг уынджы хуымæтæг рухсгæнæнты бæсты æвæрд æрцыд, электрон тых чи фæстауæрц кæны, ахæмтæ. Æмæ ныр уыцы хъуыдагыл, электрон тых раздæримæ абаргæйæ, хардзгонд цæудзæн 50 проценты каддæр. Уæвгæ, энерги фæстауæрцгæнæн программæ æххæст кæнынæн федералон бюджетæй дихгонд æрцыд 225 милуан сомы, республикæйы фæрæзтæ та сты – 276 милуан сомы.
Уазиты Хъазыбег, РЦИ-Аланийы артаджы, энергетикæйы æмæ цæрæн-коммуналон хæдзарады министр: «Уыцы программæмæ гæсгæ æрцæудзысты конд республикæйы бюджетон учреждениты кæндзыстæм энергии фæстауæрцгæгнтехнологитæ, цалцæг кæндзыстæм хъармгæнæнтæ, доны насостæ ивд æрцæудзысты 4 районы. Уымæй уæлдай ма ивдзыстæм рудзгуытæ, котельнитæ, æмæ бæстыхайты сæртæ паддзахадон учреждениты, цæмæй бирæ хзъарм ма сафæм, уый тыххæй».
Уæрæсейы 83 регионæй программæйы архайынц 28, нæ республикæ дæр ис уыдоны хыгъды. Фæрæзты иу хай ма дихгонд æрцыд, энерги фæстауæрц кæныны хъуыддагыл чи архайдзæн, уыцы кусджыты ахуыргæнæн мадзæлттыл. Ныридæгæн Мæскуыйы сæрмагонд программæмæ гæсгæ ахуыр ацыдысты 500 адæймагæй фылдæр.
