Бигъаты Николай службæ кодта Кавказы, æмæ æмгуыстад кодта йæ рæстæджы зындгонддæр адæмимæ
Евгений Вахтанговы хæдзары уыд булкъон Бигъаты Николайы чиныг «Мысинæгты» презентаци. Бигъаты Николай службæ кодта Кавказы, æмæ æмгуыстад кодта йæ рæстæджы зындгонддæр адæмимæ. Йæ мемуартæ дзурæг сты 1917-æм азы революцийы агъоммæйы æмæ йæ рæстæджы ирддæр цаутыл. Къухфыстыты сæйрагдæр хæзна – Кавказы граждайнаг хæсты бæстон æрфыст. Историктæ зæгъынц, ахæм æвдисæнтæ æххуыс кæнынц уæды æхсæнады бирæ лыстæг хъуыддæгтæ сбæлвырд кæнынæн. Чиныг рухс федта Уæрæсейы историон æхсæнады разамынды сæрдар Гагкуты Русланы, зындгонд бæстæзонæг Феликс Киреевы æмæ Екатеринбургæй историк Юрий Пыльцыны æххуысæй. Ахæм иртæстытæ ныридæгæн дæр уыдысты. Раздæр уал ныммыхуыр кодтой булкъон Хуытъиты Георгийы мысинæгтæ. Ахæм куыст цæудзæн дарддæр дæр.
