Фæндæгты æдасдзинад бахъахъхъæныны тыххæй республикæйы фæндæгтыл æвæрд æрцыд сæрмагонд къамисæнтæ. Уыдоны фæрцы рабæрæг вæййынц закъонхæлдтытæ. Фæндаджы уавæрмæ ахæм хуызы цæстдард цæуы цыппæрæм мæй.
Фæндæгты æдасдзинад бахъахъхъæныны
тыххæй республикæйы фæндæгтыл æвæрд æрцыд сæрмагонд къамисæнтæ. Уыдоны
фæрцы рабæрæг вæййынц закъонхæлдтытæ.
Фæндаджы уавæрмæ ахæм хуызы цæстдард цæуы цыппæрæм мæй. Машинæ, цас
æмбæлы, уымæй тагъддæр чи скъæры, стæй иннæ æгъдæуттæ чи халы, уыдонмæ
ивары гæххæттытæ хæссынц сæ хæдзæрттæм. Специалистты хъуыдымæ гæсгæ ацы
ногдзинад у ахадгæ, фæлæ йæм иухуызон цæстæнгас нæй.
Постхæссæг Лохаты Зарæ алы бон дæр 40
фыстæгæй къаддæр нæ байуары. Адæмы хсæн сæ хонынц «Амонды фыстæджытæ»,
æрмæст сæ кæмæ бахæссы, уыдон сыл æппындæр нæ бацин кæнынц. Растдæр
зæгъгæйæ та сты, фæндаггон змæлдты æгъдæуттæ чи не ххæст кæны, æмæ
фæндæгтыл куыд не мбæлы, афтæ тагъд чи цæуы, уыцы закъонхалджыты иварты
квитанцитæ.
Республикæйы фæндæггон æгъдæутты домæнтæ
чи халы, уыцы шофырты цыппæрæм мæй бæрæг кæнынц фотофиксаторты руаджы.
Зæгъæм, фæндагыл цæугæйæ машинæ цас æмбæлы, уымæй 10 километры тагъддæр
куы скъæрай, уæд ивар уыдзæн æппæты къаддæр – 100 сомы. Фæлæ алы адæймаг
дæр фыццаджыдæр хъуамæ хъуыды кæна фæндаджы æдасдзинадыл. Шофыртæ йæ
сæхæдæг дæр æмбарынц, фæлæ уæддæр ног фæткмæ се ппæтмæ иухуызон
цæстæнгас нæй.
Диакъонты Сергей: «Æз райстон дыууæ
фыстæджы. Амынд дзы уыдис, æртæ сæдæ сомы мæ кæй фæивар кодтой, уый.
Камерæтæ сты æмбæхст бынæтты æвæрд, нæ зынынц. Стæй ацы ногдзинад
закъонмæ гæсгæ у, æви нæ, уый дæр нæ зонын».
Уыцы фарстæн ис дзуапп – закъонмæ гæсгæ.
Фæндагыл цæуыны æнгъдæуттæ нæ домынц цыфæндыйæ дæр шофырæн
фотофиксаторы тыххæй фехъусын кæнын. Уый хыгъд цыппар мæймæ республикæйы
машинæ тагъд скъæрыны аххосæй фæндаггон фыдбылызты нымæц фæкъаддæр
фондз хатты. Цæгат Ирыстоны ныртæккæ ис 30 мобилон фиксаторы. Афæдзы
кæронмæ та æвæрд æрцæудзæн 50.
Абайты Алан, паддзахадон унитарон
куыстуат «Сектер безопасности»- йы инженер: «Сентябрæй нырмæ фæндаггон
фыдбылызты нымæц дзæвгар фæкъаддæр. Камерæтæ æвæрд сты раздæр иу
фыдбылызтæ арæхдæр кæм цыдысты, уыцы бынæтты. Шофыртæ арæх бафæрсынц,
фотофиксаторты тыххæй нысантæ фæндæгтыл бæрæг рæтты æвæрд цæуыннæ сты,
зæгъгæ. Фотофиксатортæ æмбæст не сты, æмæ дзы уымæ гæсгæ нысантæ дæр
закъонмæ гæсгæ æвæрын нæ хъæуы».
Барадхъахъхъæнæг оргæнтæ сидынц
шофыртæм, цæмæй сæ ивартæ фидой афоныл. Уымæн сын рæстæг вæййы æнæхъæн
мæй. Куы нæ сæ фидой, уæд 100 сомы дæр схизынц 8 мин соммæ. Хъуыддаг
уымæ куы æрцæуа, уæд та сын сæ фидын кæндзысты барадхъахъхъæнæг оргæнты
æххуысæй.
