Гергиты Валерийы номыл аивæдты колледжы фæндырдзæгъджыты къорд «Амыран» сси æппæтадæмон фестиваль «Баян æмæ баянæйцæгъдджыты» лауреаттæ. Фестиваль арæзт æрцыд Мæскуыйы. Цæгатирыстойнаг æрыгон музыканттæ дзы ацагътой кавказаг мелодитæй попурри
Гергиты Валерийы номыл аивæдты колледжы
фæндырдзæгъджыты къорд «Амыран» сси
æппæтадæмон фестиваль «Баян æмæ баянæйцæгъдджыты» лауреаттæ. Фестиваль
арæзт æрцыд Мæскуыйы. Цæгатирыстойнаг æрыгон музыканттæ дзы ацагътой
кавказаг мелодитæй попурри, испайнаг сюитæ, стæй Æлборты Феликсы æмæ
Гæздæнты Булаты уацмыстæ.
Зындгонд композитор Æлборты Феликсы
ирддæр уацмыстæй иу – «Фантазия». У æрыгон курдиатджын фæндырдзæгъджыты
уарзондæр цæгъдтытæй иу. Уæвгæ, «Амыраны» репертуары ис иннæ ирон
композиторты мелодитæ, Кавказы адæмон цæгъдтытæ, стæй æндæр адæмы
хæттыты уацмыстæ дæр. Æвзонг музыканттæ зæрдиагæй архайынц аивады
сусæгдзинæдтæ арфдæр базоныныл. Уымæн æвдисæн сты се нтыстдзинæдтæ
алыхуызон конкурсты æмæ фестивальты.
Мурасты Изабеллæ, Гергиты Валерийы номыл
аивæдты колледжы директор: «Цы грамотæтæ æрбаласынц, уыдон æмæ кæм
вæййынц, уым бацахсынц фыццаг, кæнæ уымæй уæлдæр бынат, гран-при кæй
хонынц. Æмæ цæ куыд нæ дæн разы. Училищæйæн кад кæнынц, бæрзонддæр ын æй
исынц. Уæвгæ училищæйы бирæ зындгонд ахуыргæнджытæ, стæй кæй ном хæссы
нæ училищæ, уый дæр кæуылты у. æмæ ацы сывæллæттæ та йæ бæрзонддæр
кæнынц».
Цалдæр боны размæ Хъоцлаты Сослан,
Абойты Хетæг æмæ Кокойты Виктория, стæй сæ ахуыргæнæг Гæзаццаты Аллæ
ссыдысты Мæскуыйæ. Архайдтой æппæтадæмон фестивалы «Баян æмæ
баянæйцгъдджытæ». Уым цæгатирыстойнаг музыкантты курдиатæн скодтой стыр
аргъ. Уый размæ та уыдысты европæйаг фестиваль «Легенды
средиземноморья»-йы , цыд Испанийы, Францийы, Италийы æмæ Монакойы. Уым
дæр Ирыстоны æрыгон фæндырдзæгъджытæ ссардтой фæндаг адæмы зæрдæмæ.
Хъоцлаты Сослан, фæндырдзæгъдджыты къорд
«Амыраны» солист: «Алы хатт дæр нæ фæфæнды, мæнæ нын нæ фыдæлтæ цы
культурæ æмæ традицитæ ныууагътой, уыдон сæ амадтой сæ нæмыггай, æмæ
куыдæй бахæццæ сты махмæ, нæ хæс у уый, æмæ сæ фыццаджыдæр ма фесафæм,
фæлæ ма сæ уæлдæр æмæ аивдæр куыд кæнæм, уый».
Гергиты Валерийы номыл аивæдты колледжы
къорд «Амыран» арæзт æрцыд 4 азы размæ. Чи дзы архайы, уыдонæй ныридæгæн
алчидæр у студент. Фæлæ се ппæтæн дæр сæйрагдæр у музыкæ.
Абойты Хетæг, фæндырдзæгъдджыты къорд
«Амыраны» солист: «Фæндырæй цæгъдын æз 6-æм къласæй нырмæ, Æрыдоны
музыкалон скъола фæдæн, æмæ мæ цард дарддæр æнæ фæндырæй нæ уынын. Стыр
бузныг зæгъын нæ ахуыргæнæгæн, Гæзацаты Аллæйæн, 4-æм курсмæ нæ схæццæ
кодта».
Фидæны азы фæндырдзæгъджыты фæнды сæ
курдиатæй бахъæлдзæг кæнын аивадуарзджыты зæрдæтæ. Концерт саразынæн
бирæ хъæуы, уымæ гæсгæ æнæхъæн афæдз кусдзысты сæ программæ алыхуызон
аив композицитæй схъæздыг кæныныл.
