Зæгъæм, æрмæст ацы азы райдианæй эндокринологон диспансеры хыгъды ис 1 мин 100 сывæллоны. 620-йæн та сæ уæз у, цас æмбæлы уымæй фылдæр. Сæ нымæц фылдæрæй фылдæр кæны. Ацы низтæ цавæр аххосæгтæм гæсгæ сæвзæрынц, стæй сæ ныхмæ куыд тох кæнын хъæуы,
Челæхсаты Ангелинæйыл цæуы æртæ азы æмæ рдæг. Радон хатт æй æрбакодтой педиатр-эндокринологмæ. Уымæн æмæ йæм афæдзы рдæджы размæ сбæрæг кодтой сæкæрниз.
Челæхсаты Любовь, Ангелинæйы мад: «Мах уыдыстæм рынчындоны. Дзæбæх нæ кодта дохтыр Геккиты Агуындæ. Процедурæтæ куы скодтам, уæд нæ арвыстой эндокринологон диспансермæ. Ахæм уавæры фæуын иу ныййарæгæн дæр мæ зæрдæ нæ зæгъдзæн. Иууылдæр мæ сабыр кодтой. Æппæт дохтыртæн дæр зæгъын бузныг».
Сæкæрнизы аххосæгтæй иу у – сывæллæттæ æгæр хæрзхуыз кæй сты, уый. Ацы азы райдианæй республикæйы эндокринологон диспансеры хыгъды ис иу мин сæдæ сабийы стæй æхсæз сæдæ дыууын æнахъом сывæллоны. Иууылдæр сты, цас æмбæлы, уымæй хæрзхуыздæр. Хъыгагæн, ахæм диагнозимæ сывæллæтты нымæц рæзы. Медицинон кусджытæ куыд зæгъынц, афтæмæй ацы уавæрæн ис цалдæр аххосаджы. Фыццаджыдæр сывæллæттæ хæрзхъæд хойраг нæ хæрынц, æмæ ма нуазынц адджын дæттæ дæр. Дыккаджы та – фæстаг рæстæг сывæллæттæ змæлгæ фаг нæ кæнынц. Эндокринологон диспансеры специалистты хъуыдымæ гæсгæ ацы фарста тынг ахсджиаг у. уыимæ канд нæ республикæйы нæ, фæлæ Уæрæсейы иннæ регионты дæр.
Хъайырты Иринæ РЦИ-Аланийы æнæниздзинадхъахъхъæнынады министрады сывæллæтты сæйраг æнæштатон эндокринолог: «Бирæ эндокринологон диспансертæ ныртæккæ кусынц ацы фарстайыл. Æрбахонынц сывæллæтты, æркæсынц сæм, сбæлвырд сын кæнынц сæ диагноз. Нæ сæйраг хæс у ацы процесс бауромын. Мах сывæллæттæн æмæ ныййарджытæн дзурæм æмбæлгæ хойрæгты тыххæй æмæ физкультурæйы тыххæй дæр».
Цæмæй сывæллæттæ раст хæринæгтæ хæрой, фылдæр змæлой ууыл хъæуы кусын, зæгъынц специадлисттæ. Нæй зæрдæ дарæн, æмæ сывæллæттæ куыд рæздзысты, афтæ мæллæгдæр кæндзысты, зæгъгæ. Хъуамæ ныййарджытæ ацы фарстайыл рагацау батыхсой.
Тобойты Мæдинæ, эндокринологон диспансеры педиатр-эндокринолог: «Ацы низимæ тох кæнын хъæуы. Кæй зæгъын æй хъæуы, æнцон хъуыддаг нæу, фæлæ æнæниздзинадæй ахсджиагдæр ацы царды ницы ис. Æмæ йыл сабибонтæй тыхсын хъæуы. Уавæр аивыныл хъуамæ архайой сывæллæттæ дæр, сæ ныййарджытæ, дохтыртæ æмæ æхсæнад æмтгæй райсгæйæ. Фылдæр æргом здахын æнæниз цардыуагмæ, спортивон секцитæм æмæ æндæр активон ирхæфсæн мадзæлттæм».
Кæд фарста тынг ахсджиаг у, уæддæр ацы нымæцтæ аивын не ппæты бон дæр у. Сæйрагдæр афоныл дохтырмæ бацæуын. Æмæ рæзгæ фæлтæрæн æнæрынцойæ æнæниз цардыуаджы æвдисæнтæй дæнцæг хæссын.
Фидараты Маринæ
