Ахсджиаг у, цæмæй ахуырдзаутæ хæрæндоны бирæгæйттæй ма мбырд кæной, уыимæ сæ хойрæгтæ та уой хæрзхъæд æмæ хæрзад
Фæлхасадмæ цæстдарды цæгатирыстойнаг управленийы амындмæ гæсгæ, республикæйы скъолаты хæрæндæттæ кусынц бæлвырд фæткмæ гæсгæ. Ахсджиаг у, цæмæй ахуырдзаутæ хæрæндоны бирæгæйттæй ма мбырд кæной, уыимæ сæ хойрæгтæ та уой хæрзхъæд æмæ хæрзад. Не сфæлдыстадон къорд бабæрæг кодта Дæллаг Санибайы æмæ Дзæуджыхъæуы 44-æм скъолатæ. Цы хатдзæгтæ скодтой, уыдоны тыххæй бæлвырддæр радзурдзæн Сосранты Жаннæ.
Дæллаг Санибайы скъолайы хæрæндоны цæттæ кæнынц райсомы хæрдмæ. Æнхъæлмæ кæсынц, ахуырдзаутæн сæ урок куы фæуа, уæдмæ. Хæринаггæнæг Мысыкаты Анжелæ нын радзырдта, хæстæгдæр 10 бонмæ сывæллæттæн цы хæринæгтæ цæттæ кæндзысты, уый тыххæй. Алы хойрагæн дæр уазалгæнæны æмæ скълдаы ис хицæн бынат, æмæ се мгъуыдмæ кæсынц бæрнон цæстæй.
Хъæстуаты Алинæ йæ уарзон хæринæгтæ рагæй сбæрæг кодта. Куыд зæгъы, афтæмæй сын скъолайы хæрзад хæринæгтæ кæнынц.
Дзæуджыхъæуы 44-æм скъолайы сихоры хæрдмæ сты цæттæ. Уыцы-иу рæстæг хæрæндоны вæййы 200 адæймаджы. Дæллаг Санибайы скъолайы куыд вæййы, афтæ ам дæр райсомы æмæ сихоры хæрд вæййынц бæлвырд фæткмæ гæсгæ. Ног системæйы ис йæхи раппæлинаг хъуыддæгтæ, зæгъы директор Цуциты Татьянæ.
Коронавирусы пандемияйы рæстæг фæлхасадмæ цæстдарды управленийы амындмæ гæсгæ хæрæндонмæ цæуæн ис бæлвырд афонмæ гæсгæ. Зæгъæм, Дæллаг Санибайы 10 сахатмæ æрбацæуынц фыццæгæм къласы ахуырдзаутæ, сахаты фæстæ – дыккæгтæ, æмæ афтæ дарддæр. Директор Доййаты Иринæ зæгъы, æппæт домæнтæ дæр æххæст кæнынц.
Скъоладзауты æдасдзинад æмæ æнæниздзинад кæддæриддæр уыдысты ахуырадон процессы ахсджиагдæр хъуыддæгтæ. Уæлдай ахадындзинад та йын ис ныртæккæйы рæстæг.
