Уымæ гæсгæ Дзæуджыхъæуы бирæвæрсыг техникумы архайынц сæ ахуыргæнинæгтæн фылдæр гæнæнтæ аразыныл
Фæллойы къабазы парахатдæр кæнынц кусæг дæсныйæдтæ. Уымæ гæсгæ Дзæуджыхъæуы бирæвæрсыг техникумы архайынц сæ ахуыргæнинæгтæн фылдæр гæнæнтæ аразыныл. Афтæ дзы ацы аз байгом ноджыдæр иу дæсныйад – хъæдæрмæгимæ бакуысты технологи. Ног æрмдæсныйады бындуртæ студенттæ ахуыр кæндзысты 3 азы. Ныртæккæ техникумы цæуы гæххæттытæ исæн кампани. Ахæсдзæн 15-æм августмæ. Уымæ гæсгæ, йæ фидæн кусæг дæсныйадимæ сбæттын кæй фæнды, уыдонæн ма ис рæстæг. Бæлвырддæр радзурдзæн Хъайтмазты Дзерассæ.
Давид Парсаданян хорз зоны, хъæдæрмæгимæ куыд кусын хъæуы, уый. Ацы хъуыддаджы йæ сæйраг æххуысгæнджытæ сты алыхуызон хырхытæ. Уыдоны фæрцы скодта йæ фыццаг хъæдын дзаума – бандон. Люстрæйы каркас æмæ стъол сцæттæ кæнын дæр Дзæуджыхъæуы бирæвæрсыг техникумы рауагъдонæн зын нæ уыд. 3 азы ахуыры фæстæ иу рæнхъы лæууынц къамодтæ, журналы стъолтæ. Давидыл 18 азы йедтæмæ нæма цæуы, фæлæ ныридæгæн кусы йæ дæсныйадмæ гæсгæ.
Æрмгусæг дæсныйадмæ гæсгæ, педагог æмæ зондамонæг йæ зæрдæйы ахастмæ гæсгæ. Герман Елошвилийæн алы ахуырдзау дæр ахсджиаг у. Куыд зæгъы, афтæмæй абон та дæсныйад парахат кæны, æмæ уымæй зæрдæ райы. Уæдæ фæллойы къабазæн дæр ис йæхи æгъдæуттæ. Кæд цавæрдæр къабæзты куысты бынæттæ къаддæр кæнынц, уæд кусæг дæсныйæдты специалистты раздæрау агурынц.
Ацы аз ма Дзæуджыхъæуы бирæвæрсыг техникумы байгом ноджы дæр иу дæсныйад – хъæдæрмæгимæ бакуысты технологи. Ног æрмдæсныйады бындуртæ студенттæ ахуыр кæндзысты 3 азы. Абон техникумы ахуыр кæны 1 мин æмæ 500 адæймаджы онг. Ахуыргæнæндоны ныртæккæ цæуы гæххæттытæ исæн кампани.
Техникумы директоры ныхæстæм гæсгæ, республикæйы арæхдæр гом кæнын райдыдтой хъæддзаумайы цехтæ, хъæдæрмæгимæ архайды куыстуæттæ. Ахуыры рæстæг студенттæ практикæ цæудзысты раззагдæр профилон куыстуæтты. Гæнæн сын уыдзæн уырдæм кусынмæ бацæуын.
Гæххæттытæ исæн кампани ам фæуыдзæн 15-æм августы. Дæсныйад нырма чи нæ равзæрста, уыцы абитуриенттæн ма ис рæстæг ахъуыды кæнынæн. Гæнæн ис, æмæ сын сæрмагондæй кусæг дæсныйад байгом кæндзæн фидæнмæ фæндаг.
