Карз уавæр нæ хынцгæйæ, цæмæй, компанитæ сæ къахыл слæууой, уый тыххæй республикæйы дарддæр æххуыс кæнынц грантты фæрцы
Фæсарæйнаг хомаг æмæ кусæнгрæзтæй чи архайы, уыцы куыстуæттæ цы уавæры бахаудысты, уый домы бынæттон гæнæнтæ фæфидардæр кæнын. Карз уавæр нæ хынцгæйæ, цæмæй, компанитæ сæ къахыл слæууой, уый тыххæй республикæйы дарддæр æххуыс кæнынц грантты фæрцы. Бæлвырддæр радзурдзæн Гуытъиаты Алинæ.
Нырыккон дуджы программæты æвзаг зонын хаттæн фæсарæйнаг æвзаг зонынæй фæахадгæдæр вæййы. Нымæцон технологитæ сты нæ æрвылбоны царды алы къабазы æмæ уый скъоладзаутæ хорз æмбарынц. Уый тыххæй сæхи виртуалон тыгъдад аразын райдайынц информатикæйы кабинеты, скъолайы ахуыр кæнгæйæ.
Æрыдоны фыццæгæм скъолайы æртæ рауагъдоны сфæнд кодтой сæ цард информацион технологитимæ сбæдтын. Дзитойты Сосланы фæнды кусын егъау информацион корпорацийы, цæмæй дзы сæххæст кæна, рагæй кæй нысан кæны, ахæм сфæлдыстадон эксперименттæ. Ныртæккæ лæппу видеохъæзтытæн аразы модификацитæ æмæ уый фæрцы кусы æхца. Елена Чередниченко æмæ Надгериты Валерия цæттæ кæнынц информатикæйæ фæлварæнмæ. Чызджытæм Сосланы бæрц фæлтæрддзинад нæма ис, фæлæ зонынц, куы сæ бафæнда — уæд сæ къухы алцыдæр бафтдзæн. Ай-Тийы къабазы ис хорз æфтиаг райсын, стæй нымад цæуы уый дæр æмæ ныртæккæ Уæрæсейы ахæм специалисттæ стæм кæй сты, уый дæр.
Фæлæ æрмæст информацион системæтæм не сты æмхиц фæсивæд. Бирæ рауагъдонты фæнды райсын кусæг дæсныйад. Уæвгæ, ахæм дæсныйæдтæ æдзухдæр хъуыдысты, фæлæ æрыгон фæлтæр тырныдта юридикон æмæ экономикон факультеттæм. Александр Запригайло йæ фыды хъуызæн уыдзæнис æндадзæг. Фарæстæмкъласон уый размæ фæуæлахиз Уорлд Скиллсы регионалон къæпхæны уыцы компетенцийы.
Алыксандрмæ æнхъæлмæ кæсынц Цæгат Кавказы аграрон-технологон колледжы. Уым ахуыр кæнынц æндадзыны алы хуызыл дæр æмæ пайда кæнынц ног ифтонгарзæй. Сваркæгæнæджы лæггæдтæн ныртæккæ хорз фидынц. Фæлæ цæмæй стыр æхцатæ кусай, уый тыххæй хъæуы бирæ зонын. Чи зоны æмæ ныртæккæ студенттæн æфсæйнаг æндадзын нырма афтæ хорз нæма уайы, фæлæ куыд фæстæдæр, сæ дæсныйад рæздзæн. Колледжы разамынды хъуыдымæ гæсгæ, хорз студент йæхицæн кæдфæндыдæр ссардзæн куыст. Корпустæй иуы ис хуыйджыты цех нырыккон машинкæтæ æмæ ахуырадон ифтонгарзимæ. Гулиты Маизæ кæд нырма фыццæгæм курсы ахуыр кæны, уæддæр йæ дæсныйад хорз зоны. Хуыйын базыдта йæ мад æмæ йæ мады мадæй. Чызджы фæнды байгом кæнын хи ателье.
Хъæдгуыстгæнджытæ, хæринаггæнджытæ, дурамайджытæ, програмисттæ, электриктæ æмæ сантехниктæ. Сæдæгай студенттæ колледжы фæстæ араст уыдзысты фæллойы фæндагыл æмæ сæ зонындзинæдтæй раст куы спайда кæной, уæд æнæ куыст никуы уыдзысты. Ноджы ма федералон гранты фæрцы ахуыргæнæндоны материалон-техникон бындур ивд æрцыд æмæ ныртæккæ дзуапп дæтты æппæт нырыккон домæнтæн.
Колледжы разамынды хъуыдымæ гæсгæ, азæй азмæ рæзы, информатикæ æмæ кусæг дæсныйæдты къабазы дарддæр рæзын кæй фæнды, уыдоны нымæц. Сæйрагдæр та хъæуы фæллойадон уавæрмæ цæстд дарын, цæмæй колледжы рауагъдонтæ сæ зонындзинæдтæй æххæстæй спайда кæнын зоной.
